عبدالمنعم أحمد نصار 52 سنة بياع فى السوق
هو إحنا لاقيين الفراخ أصلا علشان نتبطر عليها؟ الفراخ غالية، والعيشة صعبة، ويقولك فى الآخر خايف آكل فراخ علشان فيها مرض، عموما أنا مش باكل فراخ علشان مش لاقى تمنها مش علشان خايف منها، والحمد لله عايشين على الفول والطعمية والجبنة.
هانى عبدالرازق 24سنة عامل
أنا باسمع بصراحة عن موضوع الإصابات دا، بس ماشفتش أى حد اتصاب، وتقريبا كدة الإصابات محصورة فى الريف عند الناس اللى بتربى دواجن بس، وبعدين الحكومة مقصرة فى مكافحة المرض أصلا، مركزة على الفراخ اللى بتتربى فى مزارع مقفولة، ومش مهتمة بحاجات تانية زى الحمام، وفى الآخر يقولوا المرض اتوطن فى مصر ومش عارفين نتصرف معاه.
محمد حسين 24 سنة فنى معمارى
الرقابة على الطيور اللى بتتكلم عنها الحكومة مش حقيقية، تعالى شوف منطقة اسطبل عنتر، بتيجى فيها عربيات نقل محملة طيور وبتبيعها للناس من غير تطعيمات ولا كشف، وفى الآخر بيرموا الطيور الميتة فى المنطقة السكنية اللى فى اسطبل عنتر، ومفيش حد فى وزارة الصحة اهتم أو حاول يحمى السكان من الأمراض اللى ممكن تجيلهم.
السيد زكى مرسى 71 سنة بالمعاش
الشعب المصرى بطنه أهم حاجة عنده فى الدنيا، لو قلت له الفراخ فيها إيه برضه هياكلها، والحكومة مينفعش تقولهم مياكلوش الفراخ من غير ما توفرلهم بديل تانى رخيص ومناسب، فى ناس بتجيب الفرخة علشان ياكلها 10، ودول مش هيقدروا يجيبوا أى نوع تانى من اللحوم.
