حملة "أنا هنا يا ابن الحلال" للمطالبة بعدم المغالاة

أطلقت بسمة عبد الباسط الكاتبة فى مجلة ميكانو حملة على الفيس بوك بعنوان "أنا هنا يا ابن الحلال للمطالبة بعدم المغالاة" برعايه مجلة ميكانو، بلغ عدد أعضاء الجروب حتى الآن 300 عضو، وتقول بسمة: "الهدف من الحملة مش التقليل من البنات، ولا إظهارهم بأنهم هيموتوا من غير جواز ولا أنهم "بايرين أو عوانس" وخلاص بقى هيوافقوا على أى حد، لكن لو مفيش فلوس خلاص بلاها شبكة مش هنموت من غير شبكة، بالإضافة إلى باقى الطلبات والحاجات ارحموا نفسكم شوية وبلاش مغالاة ، إيه يعنى لما يكون البيت فى البداية مكون من حجرة نوم وحجرة معيشة وسفرة بس ومش لازم يعنى حجرة النوم التانية ولا الصالون التانى دلوقتى مش خلاص يعنى الزيارات مقطعة بعضها، ومش هتلاقوا مكان تقعدوا فيه الناس، ولا من تانى يوم هيكون عندكم أطفال ومش عارفين تنيموهم فين، مفيش مانع نبدأ بحاجات بسيطة وبكره هنكبر وهنجيب باقى الحاجات".

و طلبت عبد الباسط من خلال الجروب مراعاة الأهل لمشاعر أبنائهم سواء كانوا فتيات أو شباب والتخلى عن المغالاة فى الطلبات "علشان العادات والتقاليد، أو علشان فلان و فلانة عمل كده فلازم نعمل زيه، لأن مش كل الناس زى بعضها وكل واحد وظروفه".