"هنركب ضفاير ونلبس أساور"

ما زالت تنهال ردود أفعال الشباب على الفيس بوك حتى هذه اللحظات، منها انطلاق جروب "هنركب ضفاير ونلبس أساور، لو مصر خرجت وصعدت الجزاير"، فى محاولة للتأكيد على فوز مصر.

يقول كيرلس منصور مؤسس الجروب: "الجزائر هى بوابتنا لكاس العالم الشهيرة طبعا فاكرين سنة 90 لما غلبناهم هنا بجون حسام حسن وكان جيلهم الذهبى الأخضر بلومى ورابح مهجر، وطبعا سنة 2001 لما غلبناهم هنا فى القاهرة 5/2 وكان لقاء تاريخى يعنى كعبنا عالى عليهم م الآخر، طبعا كل شوية يطلعوا بتصريحات مستفزة إللى هما مش شاطرين غير فيها بس إحنا هنوريهم الويل فى ستاد القاهرة وهنبطلهم كووورة للأبد، وكلنا ورا مصر وهنوصل إنشاء الله".

وتقول مى أحمد إحدى المشاركات فى الجروب: "المنتخب الجزائرى كسر الأتوبيس بتاعنا ودلقوا على نفسهم ميكروكروم، أنا مش فاهمة دول منتخب الجزائر ولا فريق الميكروكروم"، أما أغرب التعليقات كان دعاء نشرته علا عبد الرشيد يقول: "اللهم شتت دفاع فريق الجزائر وافتح مرماهم وأعمى حارسهم وكسح هجومهم، يارب العالمين آمين".

وفى محاولة أخيرة لتمرير إرشادات عامة للمصريين المشاركين فى حضور الماتش فى الاستاد، يقول هيثم حمزاوى مؤسس جروب "مصر هتتدلع وإللى مش عاجبه يولع" عايزين لاعيبتنا تكون أعصابها تلج، أصل الواد الجزائرى من دول هيعمل كل حاجة عشان ينرفز بيها لاعيبتنا يعنى هتوصل للشتيمه والضرب فى أماكن مش مستحبه بردو عشان مصر نستحمل، وبعد الماتش والفوز إنشاء الله يبقى راجل ويطلع بره الملعب لوحده، وهو مش هيشوف إلا النور، عايزين فى أى مباراة فى الدورى العام ننسى أى حاجة بيننا ونشجع مصر وبلاش حدف طوب علشان هما بيتلككوا وإحنا مش عاوزين غير إن مصر تفوز".