أفيون الشعوب العربية أكبر جروب على الفيس بوك

"سمعت آخر نكتة؟ ادخل وهنبعتلك كل يوم رسالة بأجمد وأجدد النكت"، هذه دعوة وجهها مجموعة من الشباب على موقع الفيس بوك، فانضم إلى الجروب 55 ألف شخص فى أقل من شهرين، بدءاً من أطفال فى سن الخامسة حتى السبعين، للاستمتاع بأكثر من 600 صورة فكاهية وتعبيرية و681 موضوعاً للمناقشة يدور معظمها عن النكت.

محمود فوزى مجاهد - مؤسس الجروب - شاب لم يتجاوز الـ21 عاماً، يدهشك عندما يخبرك بأن سبب تأسيسه الجروب، هو استبعاد صديق له من الجروب الخاص به، عندما شارك فى الدعوة إلى المشاركة فى إضراب 6 أبريل، خوفاً من الخوض فى السياسة. وهنا، كما يقول، "أخذت الموضوع تحدى، وقلت لازم أعمل جروب يكون عدد أعضائه أكثر من أعضاء جروب صديقى، والذى لا يتجاوز عدد أعضائه 200 شاب، فاخترت النكتة لشعورى بأنها أكثر شىء ممكن يجمع العرب، السياسة متلمهمش.. وتلمهم حاجة هايفة". وعندما استوقفته: "لكن النكتة مش حاجة هايفة"، كانت إجابته "النكتة فى حد ذاتها مش هايفة.. لكن إحنا بنقول النكت علشان ننفث بيها عن الكبت الذى نعيش فيه.. لكن فى الغرب النكتة للضحك فقط لأنه يستطيع فى أى مكان وفى أى وقت أن يقول ويفعل ما يشاء". محمود لم يتوقع زيادة عدد الأعضاء عن 1000 شخص، لم يستطع إرسال كل النكت للجميع، فتلقى سيلا من الشتائم، ظنا منهم أنه خدعهم، ولذلك كتب على الصفحة الرئيسية: "من هنا ورايح يا جماعة النكت هاتتحط فى الريسينت نيوز علشان زى ما انتوا عارفين الجروب بقى فيه أكثر من أربعين ألف عضو وما ينفعش الأدمن يبعت رسالة للأعضاء كلهم فى وقت واحد، وآدى شوية نكت شوفوا كده وقولولى رأيكوا".

محمود يضيف: "كنت فى البداية أجمع النكت وأرسلها إلى الأعضاء، لكن كنت أنام وأصحى.. ألاقى ألف شخص دخلوا الجروب، أنا بدخل أتفرج دلوقتى والشباب بنفسه بيدخلوا ويضعوا النكت والمناقشات.. وأتدخل فقط لحذف الصور والمواضيع التى تسىء إلى المشاركين وإلى الجروب". وعن أسباب انتشار النكت الجنسية والسياسية، يقول محمود: "الشباب زهقان مش لاقى لا يتجوز، وحتى المتزوجون بيتعاملوا مع الجنس بطريقة غلط وكمان إحنا مكبوتين سياسياً محدش يقدر يقول رأيه لو قال رأيه هيتضر، علشان كده بتكون النكت طريقة للتنفيس والخروج على النظام".

ولا يتحمس محمود كثيراً إلى النكت عن الصعايدة، فهو يرى أن الهدف منها التقليل من مكانة الصعايدة، لأنهم لو حكموا البلد سيصلحونها، لأنهم متمسكون بعاداتهم "ولسة متعولموش.. لكن لو اتعولموا محدش يقول عليهم نكت.. من الآخر التقليل من الصعايدة هدف صهيونى علشان كده بمسح النكت الخاصة بالصعايدة من الجروب". ورغم النجاح الذى حققه، يسخر محمود من المشاركين على الجروب، ومن نفسه لأنه مؤسس الجروب، "أنا فرحان بأن فيه 55 ألف بنى آدم مشاركين على الجروب بتاعى بس برضه موجوع أكتر من اللى وصلنا إليه إحنا العرب، ما بقيناش قادرين نرتب أولوياتنا زى ما كنا زمان.. بصراحة بقيت بتكسف أقول قدام أصحابى إننى مؤسس جروب النكت "أفيون الشعوب العربية".