نانسي طالبة بالمنيا تحدت القوالب وأثبتت نفسها في مجال صيانة المعدات.. صور

داخل إحدى ورش صيانة المعدات الكهربائية، تقف نانسي، طالبة الصف الثالث الثانوي، ابنة محافظ المنيا، وسط الأجهزة والمعدات وكأنها تمارس المهنة منذ سنوات طويلة. ورغم صغر سنها، استطاعت أن تفرض اسمها داخل المجال حتى أصبح الكثير من الزبائن يطلقون عليها لقب المهندسة نانسي، بعدما أثبتت مهارة واضحة في صيانة وإصلاح أنواع مختلفة من المعدات الكهربائية.

وفي حديثها لـ"اليوم السابع"، قالت نانسي الطالبة في الصف الثالث الثانوي:"أنا بشتغل في ورشة والدي وهي ورشة متخصصة في صيانة جميع أنواع المعدات الكهربائية بدأت الشغل مع والدي من وأنا صغيرة جدًا، ومع الوقت بقيت أتعلم وأطور نفسي لحد ما قدرت أصلح أنواع كتير من الأجهزة والمعدات الكهربائية بإيدي، وكل ده بفضل والدي".

بداية مبكرة داخل الورشة

وعن بداية رحلتها مع العمل داخل الورشة، قالت نانسي:"أنا بدأت تقريبًا من وأنا في ثالثة ابتدائي، كنت بروح الورشة مع والدي وأراقب الشغل بعد كده بدأت أساعد في حاجات بسيطة، ومع الوقت بقيت أجرب بنفسي وأتعلم خطوة خطوة لحد ما فهمت الأعطال وبقيت أشتغل بشكل عملي .وأضافت :" والدى كان صاحب الدور الأكبر في تعليمى وتشجيعى على الاستمرار، وكان يمنحنى فرصة التجربة بنفسى حتى اتعلم ".

التعلم من الأخطاء

وعن أصعب التحديات التي واجهتها في بداية تعلمها للمهنة، أوضحت نانسي: "أصعب حاجة كانت إني أفهم الأعطال وأحلها لوحدي في الأول كنت بغلط كتير، لكن كنت بتعلم من كل غلطة وبابا كان دايمًا يشرحلي ويسيبني أشتغل بإيدي وهو يراقبني ويقولي الغلط فين، وده أكتر شيء ساعدني أتعلم وأفهم الشغل صح".وأكدت أن التجربة العملية كانت السبب الرئيسي في اكتسابها الثقة والخبرة داخل المجال.

التوفيق بين الدراسة والعمل

وبسؤالها عن كيفية التوفيق بين الدراسة والعمل، قالت: "كنت بحاول أوازن بين الاتنين، أوقات كتير كنت بذاكر بعد الشغل أو أنظم وقتي حسب ضغط الدراسة والورشة. الموضوع كان صعب، لكن كنت مقتنعة إن الدراسة والشغل الاتنين مهمين، فكنت بحاول ما أقصرش في أي حاجة"

لقبوني بـالمهندسة نانسي

وأشارت نانسي إلى إنها اكتسبت مع الوقت مهارات متعددة في الفك والتركيب وصيانة المعدات الكهربائية المختلفة، قائلة: "بقيت أتعامل مع أجهزة كتير زي الهلتي والصاروخ والشنيور بأنواعهم وموديلاتهم المختلفة، سواء كبير أو صغير ومع الوقت الناس بدأت تشوف إن شغلي كويس وفيه أمانة ومصداقية، وعشان كده بقوا يلقبوني بـالمهندسة نانسي".

تحدي نظرة المجتمع

وعن ردود فعل البعض تجاه عملها في مجال فني، قالت نانسي: "في البداية كان فيه ناس مستغربة إن بنت تشتغل في مجال صيانة معدات كهربائية، لكن أنا ما اهتمتش بنقدهم، وفي المقابل كان فيه ناس كتير بتدعمني وتشجعني لما يعرفوا إني شغالة في المجال ده".وأضافت: "كنت بحاول أثبت نفسي بشغلي ونتيجتي، وده اللي خلى الناس تحترمني وتقتنع إن الشغل مش عيب".

لحظات الفخر الحقيقية

وكشفت نانسي عن أكثر المواقف التي تشعرها بالفخر داخل عملها، قائلة:"لما جهاز يكون راح لصنايعية قبلي وقالوا إنه مش هينفع، وبعدها يجي عندي وأقدر أصلحه ويشتغل كويس جدًا، والزبون يبقى سعيد بالشغل وقتها بحس إن تعبي له قيمة وإن أنا فعلًا ماشية في الطريق الصح".

رسالة للبنات

وفي ختام حديثها وجهت رسالة للفتيات الراغبات في دخول مجالات مهنية غير تقليدية، قائلة: "مافيش حاجة اسمها ده شغل مش للبنات أي بنت تقدر تنجح في أي مجال لو عندها شغف وإصرار، والمهم إنها ما تخافش تبدأ وتكمل رغم أي صعوبات أو كلام سلبي".

نانسي طالبة ثانوية 

فتاة تعمل في تصليح المعدات

نانسي 

نانسي 

نانسي تعمل داخل الورشة

نانسي أثناء عملها