وليد ماهر عن وائل جمعة: أول مرة أشوف مدير كرة لابس تيشيرت وشورت على الخط

قدم الإعلامي وليد ماهر تغطية خاصة، حول واقعة الفيديو الخاصة بمباراة الأهلى وزد بالدورى المصرى، بين الحكم محمد معروف ووائل جمعة مدير الكرة بالنادي الأهلي، وقال علي محمود في نص الملعب كان واخد إنذار في الشوط الأول، ودخل على وش رجل لاعب من زد، وطبعا لو أخد إنذار تاني هيبقى حال الطرد، ولكن محمد معروف شاف إن مفيهاش أي مشكلة خالص في اللعبة.

وبعد كده طبعا عموتة بمساعدة وائل جمعة، كابتن وائل جمعة مدير الكرة، اللي كان لابس شورت على الخط. فأول مرة  اشوف مدير كرة بصراحة لابس شورت، لابس تيشيرت وشورت على الخط، ما شفتهاش قبل كده.

وبعدين زي ما إحنا قلنا في الماتش الأولاني، ماتش الأهلي وإنبي، كان وائل جمعة واقف بيوجه اللعيبة في الملعب وقبل الشوط التاني ما يبتدي وقف مع اللعيبة في نص الملعب وبيتكلم ويديهم توجيهات وتعليمات.

أكيد مش تعليمات إدارية، أكيد دي تعليمات فنية فأنا مستغرب إن الكابتن وائل جمعة عنده مساحة إنه يشتغل فني مع المدير الفني المحترف حسين عموتة واللي بياخد رقم كبير قوي مش رقم قليل عشان يبقى مدير الكرة بيكلمه في فنيات في وجود المدير الفني.

فدي مش مشكلة وائل جمعة دي عندنا مشكلة في الدوري المصري عندنا مديرين كرة كتير جدا بيقعدوا مع المدير الفني ويوجهوا اللعيبة عادي خالص مع إنه ملوش أي دور فني هو دوره إداري فقط.

فالمهم الكابتن وائل جمعة قال يعني أكيد نبه على عموتة إن علي محمود هيطرد فبعدها على طول تم تغيير علي محمود بأحمد رضا.