فيسبوك
واتساب
قالت الدكتورة أمال إسماعيل، الحاصلة على درجة الدكتوراه في الآداب في سن الـ83، إن تكريمها خلال الاحتفال بالمولد النبوي الشريف كان لحظة مميزة بالنسبة لها، مؤكدة أن رحلتها في التعليم جاءت تنفيذًا لأمر الله سبحانه وتعالى.
وأضافت، الحاصلة على درجة الدكتوراه في الآداب في سن الـ83، خلال تواجدها ضيفة ببرنامج الستات ما يعرفوش يكدبوا، المذاع عبر قناة CBC، «إنتوا وشكم حلو عليا لأن حتى في الماجستير طلبنا إن أنا أبقى أم مثالية أو قدمت للأم المثالية ورفضوني، وكان عندنا دكتور عبد الوهاب جودة معايا يومها، الأستاذ اللي ناقشني، وبعدها على طول السيدة الأولى كرمتنا الله يكرمها».
«أنا بحبه من يوم ما تولى الحكم»
وتحدثت الدكتورة أمال إسماعيل عن مشاعرها تجاه الرئيس، قائلة: «بصي يا بنتي أنا بحبه من يوم ما تولى الحكم، تقوليلي ليه؟ أقولك معرفش، شايفة إنه بيشتغل زي ما كان زمان جمال عبد الناصر بيشتغل بعد حكم الملك، وكان الناس كتيرة أوي تهاجمه وتقول الملك كان، برضه نفس نفس الظروف دي، أنا حبيته أوي لإنه بيشتغل فعلاً».
وأضافت: «زائد إنه عنده لطف جديد كبير أوي بأهل ببلده ولاد بلده، شوفي جاي يقابلني وأنا مجرد باحثة دكتوراه، لا عملت حاجة في البلد ولا درست لحد ولا... كل الموضوع إن أنا ربيت أربع أولاد من خيرة شباب مصر، ربنا يخليهم ويبارك فيهم يا رب ويسعدهم وأولادكم جميعاً وأولاد مصر كلهم، وعشر أحفاد ما شاء الله الله أكبر عليهم من خيرة شباب مصر برضه».
«أنا بنفذ أمر الله»
وأوضحت الدكتورة أمال أن الدافع الأساسي وراء استكمالها التعليم في هذا العمر هو تنفيذ أمر الله سبحانه وتعالى، قائلة: «كل اللي عملته ده إنني برد، برد جميل ربنا عليا، ربنا قال في الكتاب العزيز: اقرأ، أول كلمة نزلت في الكتاب العزيز اقرأ، مقالش بقى اقرأ في سن تمن سنين ولا في سن أربع سنين ولا في سن 80 سنة ولا في سن 100، مقالش، اقرأ إنجليزي، اقرأ عربي، اقرأ إنلجش، اقرأ في الدين، اقرأ في العلم، فربنا محدش حاجة معينة، اقرأ، أنا بنفذ أمر الله».
«هو أنا بوتين ولا الملك تشارلز ولا ترامب؟»
وعن لقائها بالرئيس خلال التكريم، قالت الدكتورة أمال إسماعيل: «أيوه أيوه هو أنا بوتين ولا الملك تشارلز ولا ترامب ده جاي يكرمني أنا بصفتي أم مصرية خدت الدكتوراه في سن 83 سنة، وإيه يعني، ما كل يوم ملايين رسائل الدكتوراه».
وأضافت: «وبعدين أنا اعتبرته بقولك ابني غايب عني من يوم ما تولى الحكم وأنا بحبه، بحبه أوي، تولى الحكم وأنا معتبراه ابني غايب».
وتابعت: «كنتِ بتمني اللقاء ده وجيه بقى ولازم طبعاً أقابله بالحضن وهو كمان يقابلني بالحضن».
دعاء من القلب للرئيس
وكشفت الدكتورة أمال عن الحوار الذي دار بينها وبين الرئيس خلال اللقاء، قائلة: «كان بيقولي نورتيني نورتي مصر، قولتله إنت اللي منور الدنيا بحالها، ربنا يباركلك في صحتك وعلمك ومالك وعيالك، ويجعلك ولاد وأمة محمد في كنف وجوده وحرز وعياده وستره وأمانه، دي دعوة طالعة من قلبي توحد ربنا».
وعن تعامل الرئيس معها خلال التكريم، قالت: «هي طلعتني هو عارف إني في إعاقة في رجلي فجاي يقابلني عشان يسندني، إلهي ربنا يكرمه إلهي ربنا يعطيله ما لا عين رأت ولا أذن سمعت ولا خطر على قلب بشر، وكل إنسان على أرض مصر يكرمه لأجل النبي سبحانه وتعالى».
«أولادي كلهم بررة بيا»
وتحدثت الدكتورة أمال عن أبنائها، مؤكدة أنهم جميعًا بارون بها، قائلة: «لا بصراحة بصراحة وربنا يكرمها يا بختها بيكي، لا هما ولادي كلهم بررة بس هي ظروفها اللي خلتها قريبة مني لأنها أصلاً زوجها في الخارج».
وأضافت: «جت نعمة بقى وفضل من الله إن هي تقدر تبقى عندي في الخارج وولادي الباقيين بقى مشغولين في بيوتهم وعيالهم وكدة».
وأشارت إلى أن ابنتها مرت بظروف صعبة، قائلة: «هي كان معاها ولدين مات واحد ليلة خطوبته ربنا يصبر قلبها يا رب من الصابرات، ودي بقى بتخلي حتة من قلبي مقطوعة عشان خاطرها، والتاني ربنا يكرمه متجوز بس في أكتوبر وبيشتغل في التجمع الخامس ولا... مش عارفة لكن هي قاعدة لوحدها وجوزها في اليابان».
وتابعت: «لما شكرت في الدكتورة شيرين قالتلي أنا ولادي كلهم برين بيا، يعني لأ بتدافع عنهم كلهم طبعاً، أيوه يا بنتي كلهم برين بيا».
«محمد إنسان ولا في الدنيا»
وأشادت الدكتورة أمال بابنها محمد، قائلة: «خصوصاً محمد كمان محمد اللي هو رقم اتنين في ترتيب الأولاد عندي، ده بقى إنسان ولا في الدنيا».
وأضافت: «ده يعني ماما يجي يجي مثلاً يزورني المنصورة جاي من إسكندرية هو بيشتغل في إسكندرية، ماما تتغدي إيه النهاردة، أنا أقوم أطبخ، تطبخ إيه يا ماما يلا».
«أنا بطبخ حلو أوي»
وكشفت الدكتورة أمال عن حبها للطبخ رغم تقدمها في العمر، قائلة: «ما أنا بطبخ حلو أوي»، وأضافت عن الأكلة التي يفضلها أبناؤها: «أحلى أكلة المحشي المحاشي، وأنا ضليعة فيها بحشيه بالقشطة».
وشرحت طريقتها في إعداد المحشي قائلة: «لأ لأ أنا بعمل التخدعية عادي زي أي محشي وبعدين بعملها نص ني ونص مستوي، اللي هي الصلصة بتاعة المحشي، شوية ني في ني وشوية بتسويهم، بيبقى البصل والتوم والحاجات الكلام ده كله والخضرة وكدة وحتتين معلقتين قشطة كدة يضيفوا على الكلام ده، وفي الأخر بقى تجيب اللي أنتي مسوياه على اللي مستواش وتحط الرز وتحشي».
«كان نفسي محمد يكون موجود»
وعن الشخص الذي كانت تتمنى وجوده معها في يوم التكريم، قالت الدكتورة أمال: «كلهم كان نفسي كلهم».
وأضافت عن حفيدها الراحل: «الله يرحمه محمد ابن بنتي اللي توفى، كان نفسي إنه كان يبقى موجود الله يرحمه لأنه كان فرح أوي يوم ما أنا خدت الليسانس وأنا لسه بدرس في الأول وبعد ما نشر عني واتكلم على الفيسبوك توفى تاني يوم فدي قاطعة قلبي قاطعة قلبي بجد».
وتابعت: «هو اللي بدألك بقى السوشيال ميديا وحطلك النجاحات دي وكدة».
«هو حبيبي.. أعمل إيه في نفسي؟»
وعن زوجها، قالت الدكتورة أمال إسماعيل: «لأ ده حتة تانية خالص، وأضافت: «أيوه طبعاً لأنه هو حبيبي أعمل إيه في نفسي بحبه يا ناس.
