خالد تاج الدين يكشف لتليفزيون اليوم السابع تفاصيل نقل أغنية عمرو دياب لـ لطيفة

كشف الشاعر الغنائى خالد تاج الدين عن تفاصيل انتقال أغنيته "حلى حلى"، للنجمة لطيفة، والتى طرحتها أمس، بعدما غناها النجم عمرو دياب، وكان من المفترض أن يطرحها في ألبومه الأخير.

وقال الشاعر خالد تاج الدين في مداخلة هاتفية لتيلفزيون اليوم السابع: "الأغنية من كلماتى، وألحان تامر على، وتوزيع طارق مدكور، اللى حصل إن تامر على عمل تيمة لحن وسمعه للنجمة لطيفة، فقالتله أنا عايزة خالد تاج الدين يكتب عليه كلمات، فكلمنى تامر على وقالى.. قولتله يلا بينا وعملت الأغنية".

وأضاف تاج الدين حديثه لتليفزيون اليوم السابع قائلا: "فى الوقت نفسه كنت فاتح طول الوقت خط مع عمرو دياب، كنا بنشتغل واتس آب واتصالات تليفونية.. فقولتله فيه تيمة كدة عملتها مع الملحن تامر على، فقالى أبعتهالى.. فبعتها لـ عمرو دياب، فغاب كدة ساعة.. وجه راجع قالى أنا خلاص بعتها لعادل حقى يوزعها.. قولتله بالسرعة دى قالى أه طبعا".

وتابع تاج الدين "المهم بعد كدة عمرو انشغل بقى، وأنا كنت عاملها 3 أغانى تقريبا، بس هو كان مسجل حوالى 26 أغنية، فعمرو لحد اللحظات الأخيرة قبل طرح الألبوم.. يدخل أغانى ويطلع أغانى، فأنا عرفت إن الأغنية مش نازلة فى الألبوم".

وأكد تاج الدين، أن النجمة لطيفة لم تكن تعرف أي شيء عن هذه الحكاية، حيث قال :"كدة كدة  لطيفة ماكانتش تعرف حاجة خالص عن الأغنية، وأنا اتشرفت إن اشتغلت معاها جدا.. وهى فعلا ماتعرفش حاجة خالص عن اللى حصل.. وعرضتها على عمرو دياب لإنى ماكنتش عارف لطيفة هتكملها ولا لأ... لطيفة فنانة كبيرة وصديقة، إنما عمرو بقالنا 20 سنة أصحاب فكدة كدة ببعتله على طول.. فكانت لحظة ضعف منى إن بعتها لعمرو دياب.... عشان كدة كان حق لطيفة عليا إن أكتب كدة على السوشيال ميديا.. ولا لطيفة ليها ذنب ولا عمرو دياب ليه ذنب".