نبيلة عبيد: حياتى واهتماماتى كلها كانت للفن وسعيدة بمتابعة أفلامى لحد النهارده

أكدت النجمة الكبيرة نبيلة عبيد أنها أعطت حياتها واهتماماتها على مدار عقود طويلة للفن، حيت لم يكن لديها أي شيء آخر يشغلها غيره، وقالت عبيد في مداخلة هاتفية لتليفزيون اليوم السابع: "أنا كنت مدية كل حياتى واهتماماتى بالشغل أنا معنديش حاجة تانية.. وده حتى اللى حاصل في "يا ابنتى لا تحيرينى معك"، الذى أعود من خلاله خلال الفترة المقبلة للإذاعة".

وأضافت عبيد لتليفزيون اليوم السابع قائلة:" أنا سعيدة بإن الجمهور بيتفرج لحد النهارده على أفلامى، وده الحمد لله بسبب كل المجهود اللى قدمته".

وتابعت عبيد فى حديثها لتليفزيون اليوم السابع قائلة: "الناس هتتفاجئ بالقضية اللى بنطرحها فى مسلسل "يا ابنتى لا تحيرينى معك"، وهتقول ده فعلا اللى بنشوفه دلوقتى.. المشوار بتاعى من بداياتى ده بيطمنى جدا إن أنا طول الوقت حريصة على ده".

نبيلة عبيد لـ اليوم السابع: مسلسلى الجديد بدأ بمكالمة هزار مع ابن إحسان عبد القدوس

كشفت النجمة الكبيرة نبيلة عبيد عن كواليس عودتها للإذاعة المصرية من خلال مسلسل "يا ابنتى لا تحيرينى معك"، بعدما استقبلها الإعلامى أحمد المسلمانى رئيس الهيئة الوطنية للإعلام، ومعه رئيس الإذاعة المصرية عبد الرحمن البسيونى، وتم الاتفاق على العمل لتقديمه على الإذاعة المصرية.

وقالت النجمة الكبيرة نبيلة عبيد فى مداخلة هاتفية لتليفزيون اليوم السابع: "أهلا بجمهورى حبايبى وباليوم السابع، أنا سعيدة جدا جدا إنى هعمل المسلسل ده في الإذاعة المصرية، وإن شاء الله نلاقى حاجة حلوة للتليفزيون كمان ونعملها، أنا بعمل كل حاجة لبلدى من قلبى".

نبيلة عبيد تكشف تفاصيل اختيارها لـ"يا ابنتى لا تحيرينى معك"

وعن كيفية اختيارها لهذا العمل لتعود من خلاله للإذاعة المصرية، قالت عبيد: "أنا طبعا تربطنى علاقة قوية وطيبة بعائلة الأستاذ إحسان عبد القدوس الله يرحمه.. حرمه وأولاده.. أنا اتصلت بابنه مش فاكرة عشان إيه بالظبط.. فقالى ابنه: "يا ابنتى لا تحيرينى معك"، قولتله: "الله أبعتهالى على طول.. وقولتله على طول يلا بينا، ومن هنا بدأنا الاتصالات لتنفيذ العمل.. واللى هيخرجه ويكتب السيناريو والحوار الأستاذ أحمد فتح الله، وهو مخرى قوى جدا فى الإذاعة، وطبعا أستاذ أحمد المسلمانى ربنا يسعده، احنا بنسمع الإذاعة دلوقتى، يعنى أنا قلبى بيدق لما بنسمعها والتغييرات اللى حصلت خلال الفترة الأخيرة.. وطبعا رئيس الإذاعة اللى هو تحمس برضه معانا.. فالصراحة لقيت الحماس قوى جدا إلى جانب حماسى أنا شخصيا للرواية".