نبيلة عبيد: نقل الكلام كان سبب خلافى مع نادية الجندى وقعدت سنين مش فاهمة حاجة

كشفت النجمة الكبيرة نبيلة عبيد طبيعة العلاقة التي جمعتها بالنجمة الكبيرة نادية الجندى، بل ردت على العديد من الشائعات التي طالت هذه العلاقة على مدار سنوات طويلة.

وقالت النجمة الكبيرة نبيلة عبيد فى مداخلة هاتفية لتليفزيون اليوم السابع: "مفيش غيرة بينى وبين نادية الجندى.. غيرة ليه؟!.. اللون اللى نادية بتقدمه أنا مابقدموش.. أنا عندى لون وسكة وهى عندها لون وسكة فهيكون فيه غيرة ليه؟".

وأضافت عبيد لتليفزيون اليوم السابع: "سبب المشاكل خلال فترة ما، هقولك ده من تدخل بعض الأشخاص في نقل كلام غلط مش مظبوط بيقولولها هى كلام مش حقيقى.. أنا قعدت 3 سنين مش عارفة هى المشكلة إيه؟!.. لحد ما مرة قاعدة معايا صحفية اسمها عائشة صالح مش عارفة موجودة دلوقتى ولا لأ كانت في المصور.. طرحت عليا السؤال ده.. وقالت لى حصل وحصل قولتلها ليه؟؟ قولتلها أنا ماعنديش أى فكرة".

وتابعت عبيد خلال حديثها لتليفزيون اليوم السابع قائلة: " فبدأت أتتبع بقى.. اللى بيجولى ويتكلموا ويعملوا معايا موضوعات أو كدة.. ياخدوا كلام ويوصلوه بشكل خاطئ .. لمدة 3 سنين أنا ماكنتش مشغولة غير بشغلى ومشغولة بتحضيراتى والحاجات دى كلها.. ومرة سألتنى السؤال ده وبطريقة بقى عايزة تاخد منى سبق صحفى.. قولتلها أنا ما أعرفش حاجة خالص.. قالتلى إزاى ده مالى الجرايد.. قولتلها لا لا مفيش خالص.. أنا من ناحيتى ماعنديش.. بس يجوز الناس اللى بيتكلموا معاها هما اللى بيحرفوا الكلام وهما اللى قاصدين يعملوا كدة.. بالنسبة لـ نادية أو أى حد تانى.. ماعنديش غير ثقتى فى ربنا وشغلى والناس اللى بتعامل معاهم".