شقيق سهام جلال بعد حذفه فيديوهاتها: بحب الفن جدا ولا نستعر منه

أوضح خالد جلال، شقيق الفنانة الراحلة سهام جلال، سبب حذف فيديوهاتها من على منصات التواصل الاجتماعي، حيث قال: «أنا من صغري وأنا بحب الفن جداً، وكنت أتمنى إني أطلع ممثل زي سهام الله يرحمها، فـ الموضوع مش إني مستعر من الفن تماماً».

وأضاف خالد جلال: «سهام الحمد لله محبوبة ومعروفة وهتفضل موجودة على الساحة، وهي كانت بني آدمة جميلة وممثلة جميلة، وأعتقد إن اللي كانت بتقدمه مكنش فيه نوع من أنواع الابتذال إن احنا نبقى محرجين منه أو احنا عايزين نمسحه أو نمحيه من ذاكرتنا، بالعكس احنا بنقعد نتفرج على الأعمال دي وبنستمتع بيها زينا زي أي حد بيتفرج عليها».

شقيق الفنانة الراحلة سهام جلال يوضح حقيقة إزالة محتواها من السوشيال ميديا

وأكمل خالد جلال في تصريحات تليفزيونية مع برنامج الإعلامية نهال طايل: «النقطة بقى اللي حابب أتكلم فيها، هو احنا بنمسح الحاجات دي لأن الله أعلم بالناس اللي ممكن تبقى مريضة نفسياً بتتفرج على الحاجات دي بمنظور ما، وجزء الأغاني اللي هي كانت بتنزله على التيك توك كلنا نعلم إن الأغاني اختلفت عليها الآراء، فـ أنا بالنسبة لي مش حابب أي حاجة يبقى فيها شبهة أو شك إني أسيبها لسهام، هي خلاص رحلت مش موجودة، فـ أنا دلوقتي اللي بأحاسب عليها أو مسؤول عن الحاجات دي، فـ أنا بتكلم بالنيابة عني أنا أو بالنيابة عن عيلتي. لكن سهام لو كانت موجودة مكنش حد هيجرؤ إنه يشيل لها حاجة وهتبقى حرية شخصية ليها».