حنان مطاوع لـ تليفزيون اليوم السابع: حفل فرحة مصر لدعم الشباب حاجة تشرح القلب.. السيدة انتصار السيسى تعاملت كأم لكل العرايس ونادت عليهم يتصوروا معاها.. أبويا بالنسبة لى مش نموذج فنى فقط لكن إنسانى وثقافى أيضا

تحدثت النجمة حنان مطاوع لتليفزيون اليوم السابع، حيث أعربت عن سعادتها البالغة بالمشاركة فى فعاليات مبادرة "فرحة مصر"، التي شهدت تنظيم حفل زفاف جماعى لـ1000عريس وعروس، ضمن جهود الدولة والمجتمع المدني لدعم الشباب المقبلين على الزواج وتخفيف الأعباء عنهم، وذلك بحضور وتشريف السيدة انتصار السيسى، حيث قدمت مطاوع الحفل الذى تغنى فيه عدد من النجوم منهم أحمد سعد وبوسى.

عن تقديمها للحفل ومشاركتها فيه، قالت الفنانة حنان مطاوع: "في البداية كل سنة وأنتم طيبين بمناسبة العيد وكل سنة وكل المصريين طيبين وفرحانين ومبروك لكل العرسان والعرايس اللي زفيناهم، مضيفة: "والله كان يوم ممتع ومنظم جدا ومنسق بشكل جاد قوى، وكان حقيقي الروح الغالبة هى الفرحة، يعنى طاقة المكان كلها فرحة وطول الوقت زغاريط.. ربنا طبعا يكتر أفراحنا ويفرح كل الأسر المصرية والعربية يا رب.. لا يعنى حاجة كدة تشرح القلب الحقيقة، فأنا كنت فرحانة قوى إن أنا أشارك حتى ولو بحاجة بسيطة جدا إن أنا أطلع على المسرح، وأقدم الحفلة دى يعنى دى أقل أقل حاجة تُقدم".

حنان مطاوع: السيدة انتصار السيسى تعاملت كأم لكل العرايس ونادت عليهم يتصوروا معاها

وعن لقائها بالسيدة انتصار السيسى في هذا الحفل، وقالت النجمة حنان مطاوع: "والله أنا كنت فرحانة جدا وهو الحقيقة أهم ما يميز السيدة انتصار السيسى إنها قريبة من المصريين.. هى حقيقي شبه شبه المصريين.. أه وتواضعها وأخلاقها.. يعني حتى بيبقى دايما دايما فيه تأمينات مثلا وبروتوكولات خاصة بالسيدة الأولى، لكن هى إمبارح وهى بتاخد الصورة كانت بتقول لـ العرايس.. قربوا قربوا يعني هي يعنى عندها كده لمسات إنسانية ودفئ".

وأضافت مطاوع قائلة: "السيدة انتصار السيسى، هي قالت جملة على فكرة وكانت تعنيها، قالت أنا هنا أم العروسة، والعرايس كلها أنا أمهم.. ده حقيقي والله الواحد كمان أنا شكرتها حقيقي من قلبي إنها كانت سبب في إسعاد الشباب والبنات اللي زى الورد دول يعني ربنا يسعد قلوب كل المصريين يعنى".
وقالت النجمة حنان مطاوع: "من قلبي من قلبى يا رب الفرحة تدخل قلوبنا كلنا اللى عايز يتجوز يتجوز، واللى مريض يخف.. يعنى أتمنى يارب الفرحة والسلام والأمان لبلدى يا رب".

وتابعت حنان قائلة: "طبعا هذا اليوم مميز بالنسبة لى، وبقول لك يعنى أنا كنت يعنى خجلانة إنه هم عاملين الفرح ده وإزاى يجهزوا ويجوزوا الشباب دول من أصغر حاجة لـ أكبر حاجة بتتم فى الجهاز، فالواحد كان يعنى عنده حياء إنه طب أشارك ولو بحاجة بسيطة فأنا كنت سعيدة إن أنا طالعة بقدم الحفلة.. يعني ده طبعا مشاركة ضئيلة جدا بس أهو الواحد يعنى بيمسك الفرحة والواجب فيارب الواحد يكون قدمها بشكل كويس".

حنان مطاوع لتليفزيون اليوم السابع: ملابسى فى حفل فرحة مصر صناعة مصرية

وعن اختيارها للفستان الذى طغى عليه الطابع المصرى والإكسسوارات الفرعونية، قالت مطاوع: "أنا كان حظي حلو إن الاستايلست نوران نبيل هى بنت جميلة جدا وصاحبتى، فاخترنا إن إحنا نلبس حاجة مصرية أو يعنى بسيطة متطعمة بالإكسسوار وده عملته الدكتورة هاجر نبيل،  وهى برضة متخصصة فى إنها عندها إكسسوار مصرى سواء بقى مصرى قديم اللي هو ما يسمى بالفرعونى أو مصرى بقى فلاحى أو يعنى يتماشى مع كل أذواق المصريين، واللى نفذت الفستان منار يعنى كل حاجة تضافرت الحمد لله إن الحاجة تبقى بسيطة الحمد لله".

حنان مطاوع عن غيابها عن السينما: غير مقصود إطلاقا وبختار من المعروض.. فيديو

وعن غيابها عن السينما، قالت النجمة حنان مطاوع أن غيابها لم يكن مقصودا على الإطلاق، موضحة أنها تختار دائما من وسط المعروض عليها.
وعن مدى تشابه وتناسب الأعمال المتواجدة في السوق حاليا معها من عدمه، قالت حنان: "فيه حاجات حلوة، وفيه حاجات شبهى بس هو إحنا يا عمرو دايما بنختار مما يعرض علينا، يعنى ممكن قوى اللى يتعرض عليا ما يبقاش مناسب بس مش كل اللى أنت بتشوفه على الشاشة اتعرض عليا ".

وأضافت حنان قائلة: "أنا أتعرض عليا حاجات معينة فأنا بختار اللى يعجبنى اللى أحبه، اللى يناسبنى، اللي أحس إنه مختلف، فهى الحقيقة يعنى دايما اللي بيقعد يقول بيحسن الاختيار بيحسن الاختيار لا هو فيها جزء كبير حظ ورزق، إحنا بنختار مما يعرض علينا فثق إنه اللى أنا بختاره هو من وجهه نظرى أفضل ما عرض عليا وقتها".

وعن أعمالها الجديدة في عالم الدراما التليفزيونية، قالت حنان:" الحمد لله يعنى الموسم اللى فات، كان موسم جميل الحمد لله، كان عندى شخصيتين زمزم وفريدة بمسلسلى"الكينج والمصيدة"، أنطحنا في الموسم ده، بس كان فيه تعويض ربنا كبير، وأنا يعنى بأمل فى حاجات أجمل وأحسن كمان إن شاء الله فى القادم".
وأضافت قائلة: "قاعدة أقرأ حاجات ولسه ما تعاقدتش على حاجة، ربنا يتممها على خير إن شاء الله بدعى إن ألاقى أعمال حلوة ومناسبة تعجب السادة المشاهدين".

حنان مطاوع: أبويا بالنسبة لى مش نموذج فنى فقط لكن إنسانى وثقافى أيضا

وبسؤالها عن أبرز الأشياء التي اكتسبتها من والدها الفنان الكبير الراحل كرم مطاوع أثناء اختياره للسيناريوهات المعروضه عليه، قالت حنان: "سؤال صعب يعنى أنا ما أقدرش أقيم النقطة دى، خاصة إن هو توفى وأنا صغيرة قوى بس أتمنى إن أنا أكون أخدت منه حاجات كتيرة".

وأضافت مطاوع لتليفزيون اليوم السابع قائلة: " بس أنا ماما عاصرته طبعا وهو بيقرأ الورق بتاعه، بيبقى بياخد منه إيه.. يعني كنت أنا أصغر كمان من إنى أشوف هو بيذاكر إزاى.. يعنى أنا كنت فى المدرسة مش فاهمة حاجة لسة.. لكن هو بالنسبة لى نموذج مش بس فنى.. هو نموذج فنى وإنسانى وثقافى الحقيقة يعنى هو حبيب قلبى".

وعن صحة والدتها والدتها الفنانة الكبيرة سهير المرشدى، قالت مطاوع: "الحمد لله الجمهور أتطمن بنفسه، هى كانت بتتكرم فى مهرجان الأقصر للسينما الأفريقية في شهر مارس الماضى، وكمان كانت بتتكرم من أسبوعين في مهرجان عنابة ورجعت بالسلامة.. فكان تكريمين ورا بعض حلوين قوى.. واحد فى بلد بلدنا مصر وواحد ثانى برضه فى بلد شقيقة عظيمة زى الجزائر، فالحمد لله كان في نشاط الفترة اللى فاتت".

حنان مطاوع: أتمنى عملا يجمعنى بأمى وآخد من نورها وادفى بيه

وبسؤالها عن إمكانية أن يجمعها عمل بوالدتها الفنانة سهير المرشدى، قالت حنان: "هو أنا طول ده أنا يبقى ليا الشرف إن أنا اشتغل مع أمى، وأقف جنبها كدة وأخد من نورها وأدفى بيه بس أنا ما بفرضش حد أبدا.. وأنا ما بقترحش أصلا حد يعنى حتى لو اقترحت بيبقى من باب المشاركة وما بقترحش حد من أهلى أبدا.. لإن ده اختيار المخرج والمنتج وحتى لو قالوا لى بيبقى رأيى استشارى جدا.. وعمرى ما هقول هاتوا ماما وبعدين ماما أكبر بكتير من إنى أقول هات أمى مش هتعمل أم عادية.. ماما لازم تعمل دور تحس إن هو يستاهل يليق بموهبتها وبتاريخها طبعا الكبير يعنى".