حنان مطاوع: أتمنى عملا يجمعنى بأمى وآخد من نورها وادفى بيه

الأربعاء، 20 مايو 2026 06:31 م

حنان مطاوع فى مداخلة لتليفزيون اليوم السابع مع عمرو صحصاح

حاورها عمرو صحصاح

طمأنت النجمة حنان مطاوع الجمهور على والدتها الفنانة الكبيرة سهير المرشدى، حيث قالت: «الحمد لله الجمهور اتطمن بنفسه، هى كانت بتتكرم فى مهرجان الأقصر للسينما الأفريقية في شهر مارس الماضى، وكمان كانت بتتكرم من أسبوعين في مهرجان عنابة ورجعت بالسلامة.. فكان تكريمين ورا بعض حلوين قوى.. واحد فى بلدنا مصر وواحد ثانى برضه فى بلد شقيقة عظيمة زى الجزائر، فالحمد لله كان في نشاط الفترة اللى فاتت».

وبسؤالها عن إمكانية أن يجمعها عمل بوالدتها الفنانة سهير المرشدى، قالت حنان لتليفزيون اليوم السابع: «هو أنا طول ده أنا يبقى ليا الشرف إن أنا أشتغل مع أمى، وأقف جنبها كدة وأخد من نورها وادفى بيه بس أنا ما بفرضش حد أبدا.. وأنا ما بقترحش أصلا حد يعنى حتى لو اقترحت بيبقى من باب المشاركة وما بقترحش حد من أهلى أبدا.. لإن ده اختيار المخرج والمنتج وحتى لو قالوا لى بيبقى رأيى استشارى جدا.. وعمرى ما هقول هاتوا ماما وبعدين ماما أكبر بكتير من إنى أقول هات أمى مش هتعمل أم عادية.. ماما لازم تعمل دور تحس إن هو يستاهل يليق بموهبتها وبتاريخها طبعا الكبير يعنى".

حنان مطاوع: أبويا بالنسبة لى مش نموذج فنى فقط لكن إنسانى وثقافى أيضا

وتحدثت النجمة حنان مطاوع لتليفزيون اليوم السابع، وبسؤالها عن أبرز الأشياء التي اكتسبتها من والدها الفنان الكبير الراحل كرم مطاوع أثناء اختياره للسيناريوهات المعروضة عليه، قالت حنان: سؤال صعب يعنى أنا ما أقدرش أقيم النقطة دى، خاصة إن هو توفى وأنا صغيرة قوى بس أتمنى إن أنا أكون أخدت منه حاجات كتيرة.

وأضافت مطاوع لتليفزيون اليوم السابع قائلة: بس أنا ماما عاصرته طبعا وهو بيقرأ الورق بتاعه، بيبقى بياخد منه إيه.. يعني كنت أنا أصغر كمان من إنى أشوف هو بيذاكر إزاى.. يعنى أنا كنت فى المدرسة مش فاهمة حاجة لسة.. لكن هو بالنسبة لى نموذج مش بس فنى.. هو نموذج فنى وإنسانى وثقافى الحقيقة يعنى هو حبيب قلبى.

حنان مطاوع لتليفزيون اليوم السابع: ملابسى فى حفل فرحة مصر صناعة مصرية

وأكدت النجمة حنان مطاوع لتليفزيون اليوم السابع، أنها حرصت على ارتداء ملابس ذات شكل وروح مصرية بحفل فرحة مصر، والذى أقيم أمس الأول بحضور وتشريف السيدة انتصار السيسى، الحفل كان عبارة عن تنظيم حفل زفاف جماعى لـ1000 عريس وعروس، ضمن جهود الدولة والمجتمع المدني لدعم الشباب المقبلين على الزواج وتخفيف الأعباء عنهم.

وقالت حنان لتليفزيون اليوم السابع: أنا كان حظي حلو إن الاستايلست نوران نبيل هى بنت جميلة جدا وصاحبتى، فاخترنا إن إحنا نلبس حاجة مصرية أو يعنى بسيطة متطعمة بالإكسسوار وده عملته الدكتورة هاجر نبيل، وهى برضة متخصصة فى إنها عندها إكسسوار مصرى سواء بقى مصرى قديم اللي هو ما يسمى بالفرعونى أو مصرى بقى فلاحى أو يعنى يتماشى مع كل أذواق المصريين، واللى نفذت الفستان منار يعنى كل حاجة تضافرت الحمد لله إن الحاجة تبقى بسيطة الحمد لله.