لبلبة لتليفزيون اليوم السابع: صورت مشهد مع الزعيم تحت المياه وكنت هموت بجد

كواليس مهمة حكتها النجمة الكبيرة لبلبة عن فيلم "عريس من جهة أمنية"، والتي شاركت في بطولته مع الزعيم الكبير عادل إمام، وذلك خلال مداخلة هاتفية لتليفزيون اليوم السابع، وذلك بالتزامن مع الاحتفال بعيد ميلاد النجم الكبير أمس الأحد 17 مايو، حيث قالت: "كان فيه مشهد بعمله وأنا بوصل باللانش وهنط من فوق اللانش على الميه بجزمتى.. أكان عادل إمام خايف عليا أقع.. قالهم ياجماعة قولولها هتنط إزاى.. وبعدين قالولى الأستاذ عادل خايف عليكى مرتاحة في النطة؟... قولتلهم ماتخافوش أنا أكروبال.. وبعدين نطيت من اللانش فضل هو يضحك.. وبعدين ضربته بالبوكس تحت الميه، وكان خايف عليا أوى يحصلى تمزق أو أي شيء.. أخلاقه عالية بيحب اللى حواليه وبيخاف عليهم".

وأضافت لبلبة قائلة: "فيه مشهد تانى لما دخلنى جوة الميه، وأنا ماكنتش عارفة.. كان متفق مع المخرج، وأنا مش عارفة وخاف عليا لإنه عارف إنى ما بعرفش أعوم.. فهو خاف عليا.. راح مجرجرنى جوه الميه وأبتدى المخرج يقوله أضربها ويقولى أضربيه.. بس لقيته بيغرقنى.. فوجهت ضهرى للكاميرا وقولتله يا عادل هموت الله يخليك مش قادرة آخد نفسى.. وكان المشهد طبيعى جدا ودمه خفيف جدا.. ولما خلصنا المشهد السياح اللى كانوا واقفين يتفرجوا علينا على الشاطئ سقفولنا من كتر ماكانوا مبسوطين مننا".

أعمال جمعت لبلبة بالزعيم عادل إمام

ومن المعروف أن النجمة الكبيرة لبلبة قدمت دويتو مهم ومميز مع الزعيم عادل إمام سواء في السينما أو الدراما التليفزيونية منها أفلام "خلى بالك من جيرانك"، و"البعض يذهب للمأذون مرتين"، و"احترس من الخط"و"عصابة حمادة وتوتو"، و"عريس من جهة أمنية"، وغيرها وفى الدراما التليفزيونية قدمت معه مسلسلى "صاحب السعادة"و"مأمون وشركاه".