حلمى عبد الباقى بعد شطبه من الموسيقيين: غير قانونى وواثق فى ربنا ومكمل لـ آخر نفس

أكد الفنان حلمى عبد الباقى أن قرار شطبه من نقابة المهن الموسيقية فيه مبالغات كبرى وغير قانونى وبمثابة حكم بالإعدام ضده، وقال في مداخلة هاتفية لتليفزيون اليوم السابع: "أنا من جوايا واثق في ربنا وواثق في نفسى جدا الحمد لله.. وشطبى غير قانونى.. اللى بيتشطب ده بيكون عامل جريمة.. حرامى مرتشى.. تربح من تحت لتحت أو عمل حاجة مخلة بالشرف.. لكن لو خطأ إدارى ما ينفعش فيه هذا القرار.. لازم هنعمل فيه مجلس استئنافى وهتتعاد تانى الحكاية بس من خارج النقابة بيكون من وزارة الثقافة.. ناس بره النقابة يعنى.. وهلجأ للقضاء وأنا وراء حقى لحد ما ربنا يظهره وطبعا مكمل لأخر نقطة".

حلمى عبد الباقى لتليفزيون اليوم السابع: مصطفى كامل خصم وحكم وشطبى من النقابة بمثابة حكم بالإعدام

تحدث الفنان حلمى عبد الباقى عن تعرضه للشطب من نقابة المهن الموسيقية، حيث أوضح أن هناك شيء غير قانونى يحدث معه، وقال في مداخلة هاتفية لتليفزيون اليوم السابع: "مجلس التأديب اللى شطبنى بيضم نقيب المهن الموسيقية وهنا أنا بعتبره خصم وحكم.. أنا ما أعرفش في القانون ينفع ولا لأ".

وأضاف عبد الباقى قائلا: "هو كان حصل المشكلة بينى وبين النقيب مصطفى كامل لما حصل تسريب صوتى.. فكان فيه خصومة.. وأنا رفعت قضية سب وقذف والدنيا ماكانتش على مايرام.. لما أنا كنت قاعد مع المحامى بتاعى في مجلس التأديب حسيت إن فيه تعنت كبير جدا ضدى.. أقوله طب فلان الفلانى لما حصل كذا كذا.. قالى أنت هتقعد تقولى بقى قولتلى وقولتلك.. فحسيت من جوايا إن فيه تعنت وإن الموضوع فيه شطب فيه شطب يعنى أنا كنت متوقع ده".

وتابع عبد الباقى حديثه قائلا: "أولا فيه أكتر من جزاء..  يعنى لو فيه خطأ إدارى منى ففيه إنذار أو غيره.. لكن آخر آخر قرار خالص هو الشطب.. ده قرار أنا بعتبره حكم بالإعدام.. إن أنت تحكم على فنان بقاله أربعين سنة في المهنة وعنده نجاحات فنية ونجاحات نقابية وعاملت كل الناس بالحسنى وبكل حب وبكل إحترام تعمل معاه كدة.. فيه نية مبيتة مع سبق الإصرار".

واستطرد عبد الباقى خلال حديثه قائلا: "أيام الموضوع بتاع ناصر صقر الله يرحمه، حصلت مكالمة مداخلة بينى وبين النقيب وبين مدير الحسابات.. أولا بعض الجوابات اللى بينى وبين النقيب دى.. المستشفى غيرت البروتوكول للمريض لإنى البروتوكول الأولانى ماكانش نافع فتكلفة العلاج بقت أعلى وبالتالي نسبة تحمل النقابة بقت أكبر.. المهم حصلت مكالمة ثلاثية قالولى ياحلمى الموضوع بقى 400 ألف تقريبا.. قولتله أنا ما أعرفش أنت كنت عارف إن أنا ببعتله جوابات وهو كان عارف فعلا.. لكن لا يعلم زيى وزى المريض إن البروتوكول بالمبالغ دى.. قولتله يمكن ربنا كان عامينا إن إحنا نعرف عشان الراجل ده ياخد الجرعة بتاعته وربنا يشفيه.. وفعلا بعد الجرعة الأولانية بقى كويس وعمل فيديو وقال بشكر النقيب وبشكر النقابة".