قصيدة نظرة الباب.. لـ محمد إيهاب البشبيشى

يستعد بيت الشعر العربي، بإدارة الشاعر سامح محجوب، لإطلاق الدورة الثانية من "ملتقى بيت الشعر العربي للنص الجديد"، وذلك خلال يومي 2 و3 مايو، في إطار استكمال التجربة التي حققت حضورًا لافتًا في المشهد الثقافي خلال دورتها الأولى واليوم مع قصيدة نظرة الباب .. لـ محمد إيهاب البشبيشي

فيه شيء بيهرب
 

جايز صدى أو دخان
جايز زمان أو مكان
وجايز أنا
زي البيبان
شاهد طلوع الدندنة
تيجي تشوف كسرة رجوعنا
يوم ما خرجنا بهيمنة

من كل نقطة في الوجود
فيه شيء بيهرب
على وسعه المكان محدود
والنسيج كله مكهرب

كلنا واقف مكانه
كلنا خايف زمانه
وكلنا زي البيبان
شاهدين على تعب الإياب
ومفتوحين على وسعنا
للصادق وللكداب
وبيستوي عندنا
البيت
وبرة الباب

بقولكم
فيه شيء بيهرب
سمعت صوته ع الدَرَج
جايز فيه ناس اتسللت من دموعي
وجايز شخص عادي خرج
ولا طفولتي بتهرب من طلوعي
وبنسى قبل الذكرى ماتموت م الحرج
فيه شيء هرَب
حاسس فراغه بين ضلوعي
وفقده مسببلي عَرَج

وانا لوحدي
طالل على طلل الزمن
قلقان
شايف اللعبة على الرقعة
قبل ما تتلعب
وبعد ما اتلعبت في آن
حد يجاوبني
دا خلل في الزمان ولا المكان
ولا اختلال فيا
زي لما..
رمت حبي في الزبالة
وبعدها مسكت إيديا
فيه ناس بتعرف تإذي بالحنية
وكله بيبان من قفلته
فيه شاب لما انطرد
مقفلنيش بعصبية!
ولا حَكَم قبضته
واحيانا يشوفوا بعض
في عينيا
وميشوفوش نظرتي
كل الحاجات في قبضتي
ومش قبضتي
زي الرمال بين الصوابع
زي الآمال اللي في بالي
فيه شيء بيهرب
كل يوم
من خلالي