فيسبوك
واتساب
يستعد بيت الشعر العربي، بإدارة الشاعر سامح محجوب، لإطلاق الدورة الثانية من "ملتقى بيت الشعر العربي للنص الجديد"، وذلك خلال يومي 2 و3 مايو، في إطار استكمال التجربة التي حققت حضورًا لافتًا في المشهد الثقافي خلال دورتها الأولى.
مجهول الهوية.. محمد الحداد
دلوقتي عادي ممكن نختفي
ونحتفي باللاظهور
نخش الدنيا نتسَحب
كما العفاريت في آخر الليل
ننادي بصوت مهوش مسموع
على الأوطان
ننادي وروحنا نازفة دموع
من الأحزان
قتلنا الخوف قميص يوسف
نزلنا غرقنا في الألوان
أتاري كلنا بنشوف
نفوسنا مراية ممسوحة من الإنسان.
مجهول الهوية
مجهول القضية
مجهول الحكاية
مجهول بيرفع قصته
لحضن الغواية.
طب مين يجاوب ع الأسئلة
كاسين أمل بعد الانهزام
يساووا كام
طب مين هيصلب مين
في نهاية الشريط
طب مين يخلص شنقته
بعد الخساير ويكون حويط
طب مين هيسأل ضحكته
هتيجي تاني
بعد ما يدمع محيط.
هنا كل ضل ملوش مدلول
هنا كل خل ملوش خلول
هنا كل موت ملوش مفعول
لو كان ما عرفش يغني
على لحن وداعك المشلول
هنا كل العالم بيحاكمك
علشان مش بإيديك حلول.
هنا كل سجايري منفية
وشفايف بتصدر نووي من الدخان
هنا كل قصايدي معنية
بالقصد الفاضي في المليان
هنا دم جناجي في وسط سماكي
يروي زتون ويموت ع الورقة
أنا عمري ما أزايد على إنسان
بِيموت بالصدفة في قلب العركة.
لله
لله بنموت
لله
اِدُّونا حياة
بنشق الحجرة
لأجل التمرة
بنسرق أملة
طايرة ودايرة
ورافعة دماغها
تقول الله
بنشاور بالقوي
يمكن يمكن تلمحنا
تدينا هوية
هوية إنسان
رأيه غير ملزم للعامة
وبيعلن ببساطة
إنه الأوطان
محمد الحداد
• شاعر عامية وقصيدة نثر وكاتب قصة
• من مواليد القاهرة، ومن أصول جنوبية (أسيوط)
• خريج ورشة إضافة الإبداعية الدفعة 7 عام 2014
• شارك مرتين في مسابقة إبداع شباب الجامعات وتم تكريمه في مؤتمر الأقاليم
• أصدر ديوان بالعامية بعنوان " قهوة سمرة" عن دار فهرس للنشر
• وله ديوان قصيدة نثر تحت الطبع بعنوان "نوافذ سائلة"
