نيبو وأرض الفراعنة.. سر الحجر الذى سبق الحضارة

وقفت نيبو أمام قطعة صغيرة داخل صندوق عرض زجاجى فى المتحف الكبير.
كرم مستغرب:
إيه ده؟
حجر عادى يعنى؟
نيبو لم تتحرك
كانت عيناها مثبتتين على الحجر.. كأنها ترى ما لا نراه.
منصور بصوت هادئ:
ده مش تمثال
ومش مومياء
مجرد حجر.
ثم نظر إلى كرم وأضاف:
مش أى حجر يا كرم.
كرم:
يعنى إيه مش أى حجر؟
منصور:
ده أقدم قطعة فى أثرية فى العالم.
كرم مندهش:
أقدم من المصريين القدماء؟
منصور:
أقدم بكتير
اقترب كرم أكثر من القطعة.
كرم:
يعنى بقالها كام سنة على كده؟
منصور ببطء شديد:
عمرها حوالي
700 ألف سنة
ساد صمت ثقيل.
كرم مذهول:
700 ألف؟!
يعنى قبل الملوك؟
منصور:
قبل ما يكون فيه ملوك أصلًا
قبل المعابد
قبل المدن
ده زمن كان الإنسان فيه بيتعلم أول درس فى البقاء.
كرم:
ياااه
منصور:
القطعة دى اسمها فأس يدوية حجرية
عثروا عليها فى منطقة العباسية
وتم تأريخها من خلال الرواسب النيلية.
كرم:
كانوا بيعملوا بيها إيه؟
منصور:
كل حاجة تقريبًا
يصطادوا بيها الحيوانات
يقطعوا الأشجار
يجهزوا الأكل
كانت أداة حياة
جلست نيبو أمام الفأس
وكأنها تحرس بداية القصة كلها.
منصور:
دى من العصر الحجرى القديم
أقدم عصور ما قبل التاريخ
الإنسان وقتها ما كانش عايش فى بيوت مستقرة
كان بيتنقل من مكان لمكان
يدور على أكل ومياه وأمان.
كرم:
يعنى ده أول اختراع؟
منصور مبتسم:
ممكن نقول كده
أول خطوة حقيقية فى طريق طويل
وصل فى الآخر للأهرامات
والمعابد
والكتابة.
فجأة ضربت نيبو الأرض بمخلبها برفق
صوت خفيف ارتد فى القاعة.
كرم:
هى بتعمل كده ليه؟
منصور ينظر للحجر بعمق:
واضح إن نيبو عايزة تقولنا حاجة
إن الحضارة ما بدأتش مرة واحدة
بدأت بخطوة
بحجر
بفكرة.
رفعت نيبو رأسها
ثم استدارت ببطء
لكن هذه المرة
لم تتجه إلى زمن أقدم
بل إلى زمن القوة
زمن الملوك المحاربين
توقفت أمام لوحة حجرية ضخمة منقوشة.
كرم بحماس:
إيه ده بقى؟
منصور بصوت يحمل رهبة:
واضح إننا رايحين لعصر ملك قوى جدًا
ملك واجه أخطر التحديات بعد رمسيس العظيم
اسمه مرنبتاح.
كرم:
مين مرنبتاح؟
نظرت نيبو إلى النقوش
وكأنها تعرف سرًا خطيرًا.
منصور بصوت منخفض:
القصة دى مش بس عن ملك
دى عن معركة غيرت التاريخ
وسر محفور فى حجر
هتفهمه المرة اللى جاية..

نيبو وأرض الفراعنة