بيوت النيل.. حكايات أسر تعيش على أمواج المياه.. فيديو

الثلاثاء، 03 فبراير 2026 05:00 م

حكايات أسر تعيش على أمواج المياه

كتبت نهير عبد النبى - خلود رفعت – روان يحيى

بين ضفتي النيل هناك حياة أخرى وعالم لا تلمسه الأقدام، مراكب خشبية تهتز مع التيار وتحمل فوقها بيوتا كاملة وأسرا تعيش وتنام وتعمل في حضن النيل، بلا جدران ولا أبواب مغلقة، اختارت هذه الأسر أن يكون النهر بيتها وملاذها الوحيد من ضجيج العالم.

في هذا العالم البسيط يبدأ النهار مع أول رائحة لقطرات الندى، ويستيقظ الأطفال على صوت أمواج المياه بدل من صوت منبه المدرسة، رجال ونساء يحاربون لأجل لقمة العيش حاملين على عاتقهم مهنة توارثتها الأجيال.

حكايات أسر تعيش على أمواج المياه

عاش اليوم السابع يوما كاملا مع سكان النيل لنسمع حكايتهم ويومياتهم وسر تمسكهم بالحياة في النيل، فكان لقاءنا الأول مع كبير المراكبية محمد حماد والذى بدأ كلامه معنا بجملة: لو خيرونى إنى أعيش في قصر الملك فاروق ولا أعيش في المركب هختار المركب، وقال خلال لقائه تليفزيون اليوم السابع: أنا مولود في النيل يعنى بقالى 59 سنة عايش فى النيل، مهنة الصيد دى وراثة فى عيلتنا ابا عن جد، وولادى كلهم علمتهم الصيد وهما معايا على المركب، وإخواتى السبعة فى النيل بزوجاتهم وأولادهم، هنا في المركب زى البيت بالظبط كل حاجة ممكن نحتاجها مطبخ وأدوات الصيد وتليفزيون وشعلة بوتجاز وبطاطين، هو الفرق إن الشقة فيها جدران إنما المركب من غير جدران، وفيه ناس بتتمنى انها تقعد معانا.

أسر تعيش على أمواج المياه

وأضاف: أنا عندي بيت تلات أدوار 100 متر لكن مش بحب اروح المنوفية واقعد فى البيت ده وبحب أقعد في المركب بتاعتى، وزوجتى كمان بتحب تقعد معايا في المركب واتعلمت شغلانة الصيد ، وبنصحى انا وهى الساعة 5 الصبح نرمى الصنارة ونتوكل على الله واحنا ورزقنا، ولما بنيجى لازم ناكل أحلى أكلة سمك منها وخصوصا الملوخية بالسمك. وقال نجله أحمد محمد: احنا عايشين في المركب ومرتاحين والحمد لله وولادى معايا ونفسى يبقوا أحسن منى، أنا بعلمهم وبيروحو مدارس بس أغلب الوقت بيكونو معاياعلى المركب ، وبعلمهم العوم عشان ميحصلهمش حاجة.

وتابع: احنا صيف وشتاء بنشتغل في النيل وعايشين في النيل بس احنا ورزقنا ممكن ربنا يرزقنا النهاردة وممكن لأ، فاحنا عندنا صبر والحمد لله والزرق ده بتاع ربنا.