فيسبوك
واتساب
منصور وكرم ونيبو واقفون أمام قاعة كنوز الملك توت عنخ آمون.
منصور بصوت هادئ وغامض:
يا كرم
هاقول لك النهارده حكاية أغلى قطعة فى العالم.
كرم مندهشا:
أغلى من الألماس يعنى؟
منصور:
أغلى من أى حاجة تتخيلها.
قطعة وزنها 11 كيلو ذهب خالص.
كرم:
11 كيلو؟!
ده وزن حقيبة سفر كبيرة!
منصور يشير إلى القناع:
ده قناع الملك توت عنخ آمون.
كرم:
هو ليه الملك ده مشهور قوى كده؟
منصور:
تخيل يا كرم.. ملك صغير مسك الحكم وهو طفل تقريبا،
وحكم بس 9 سنين.. بين سنة 1336 و1327 قبل الميلاد،
ومن الأسرة الثامنة عشرة.
مقبرته كانت صغيرة ومتواضعة للغاية،
لكن اللى جواها.
كنز يهز العالم.
منصور يخفض صوته:
نرجع بالزمن ليوم 4 نوفمبر 1922.
الشمس حامية فى وادى الملوك.
طفل اسمه حسين عبدالرسول
كان شغله يجيب مياه للعمال.
وأثناء وجوده فى الموقع، شعر إن جرار المياه هتقع من على حماره، فقرر يعيد ربطها، وهو بيربط الجرار، واحدة خبطت فى حاجة صلبة تحت التراب.
كرم متحمسا:
كنز؟!
منصور:
حفر شوية بفأس صغير، ولقى أول درجة سلم فرعونية.
وجرى بسرعة على عالم الآثار البريطانى هوارد كارتر، وقال له:
«يا سيد كارتر، لقيت درجة سلم».
راحوا للمكان وبدأوا يحفروا، وظهر قدامهم شيء عجيب.
كرم:
ظهر إيه؟
منصور:
ظهر 16 درجة كاملة.
كارتر دخل مصباحا يعمل بالغاز،
ولما سألوه: شايف إيه؟
قال الجملة الشهيرة:
«أرى أشياء رائعة!».
المقبرة كان فيها أكتر من 5000 قطعة أثرية:
ملابس، مجوهرات،
ألعاب، أسلحة، أثاث ملكى، تحف ذهبية…
كأن الزمن اتجمد 3000 سنة. والمفاجأة؟
كرم:
إيه المفاجأة؟
منصور:
المقبرة ما اتسرقتش خالص.
كرم:
معقول؟!
منصور يشير إلى القناع:
لكن أجمل وأغلى قطعة كانت القناع ده.
مصنوع من الذهب الخالص، وزنه 11 كيلو، مكوَّن من طبقتين من الذهب، اتربطوا بتقنية الطرق العبقرية، ودراسات علمية أثبتت إنه اتصنع فى حوالى 70 يوم بس… تخيل!
كرم:
يعنى المصريين القدماء كانوا شاطرين قوى كده؟
منصور:
مش شاطرين بس… دول عباقرة.
استخدموا درجات مختلفة من لون الذهب، وزينوه بالأحجار الكريمة حوالين الوجه، وعلى ظهر القناع فى نقوش هيروغليفية طويلة
من كتاب اسمه «الخروج إلى النهار»، أو اللى بنسميه «كتاب الموتى».
كرم:
كتاب الموتى؟ يعنى إيه؟
منصور:
دى نصوص دينية كانت بتحمى الملك فى رحلته للعالم الآخر بعد الوفاة، يعنى القناع مش بس زينة، ده حماية روحية كمان.
كرم:
طب ليه توت بقى أشهر من ملوك كبار زيه؟
منصور:
علشان مقبرته اتلاقت كاملة من غير سرقة.
العالم كله انبهر، والقناع ده بقى رمز لمصر وللحضارة كلها.
منصور:
شايف يا كرم؟
القصة دى مش بس عن كنز، دى عن طفل بسيط
غير مجرى التاريخ، وعن حضارة عظيمة، قدرت تبهر العالم.
كرم:
طيب.. وبعدين؟
منصور يبتسم:
بعدين، المرة اللى جاية
هاحكى لك عن مركب اتصنعت من الخشب
من غير مسمار معدنى واحد.
نيبو:
ميااو.
منصور وكرم ونيبو
