فيسبوك
واتساب
منصور وكرم
منصور:
كرم، شايف الحاجة الطويلة اللى واقفة هناك؟
كرم ينظر إلى أعلى ويفتح عينيه بدهشة:
إيه ده؟!
دى عمود طويل قوى!
هو مش واقع ليه؟
منصور يبتسم:
مش عمود يا كرم،
دى مسلة الملك رمسيس الثانى،
وأغرب مسلة فى العالم!
كرم:
أغرب إزاى يعنى؟
منصور:
دى أول مسلة معلّقة فى التاريخ.
مش قاعدة على الأرض زى أى مسلة،
لا، دى مرفوعة على قاعدة فولاذ ضخمة.
كرم:
يعنى طايرة؟
منصور يضحك:
مش طايرة،
بس متصممة بطريقة تخليك تحس إنها عايمة فى الهوا.
المسلة دى جت من مدينة اسمها صان الحجر.
كرم:
إيه صان الحجر دى؟
منصور:
دى مدينة أثرية قديمة جدًا،
اسمها القديم كان تانيس،
وموجودة فى محافظة الشرقية.
هناك كانت المسلة واقفة من آلاف السنين.
كرم:
ياااه… آلاف السنين!
منصور:
آه… بس المفاجأة بقى،
عارف يا كرم إن فى حاجة كانت مستخبية تحت المسلة؟
كرم بدهشة:
مستخبية؟!
إيه ده… كنز؟
منصور:
تقريبًا كده.
جواها كان فى خرطوش الملك رمسيس التانى،
فضل مخفى أكتر من 3500 سنة.
كرم وهو مندهش:
يعنى اسمه كان مستخبى كل الوقت ده ومحدش يعرف؟
منصور:
آه.
ولما اترفعت المسلة بالشكل الجديد ده،
الخرطوش ظهر للنور،
كأن الملك بيقول:
«أنا رجعت تانى».
كرم:
طب هى تقيلة قد إيه؟
منصور:
تقيلة جدًا.
وزنها حوالى 110 أطنان.
كرم:
يعنى أثقل من فيل؟
منصور:
أثقل من ميت فيل كمان!
وعلشان كده اتعمل لها قاعدة وزنها حوالى 300 طن،
علشان تفضل ثابتة حتى لو حصلت زلازل.
وفى حواليها خندق حماية،
ومرفوعة على أربع أعمدة
مكتوب عليها كلمة «مصر» بكل لغات العالم،
كأنها بتقول لكل زائر:
«أهلاً بيك فى أرض الحضارة العريقة».
المسلة دى ما بقتش مجرد أثر،
بقت رمزًا لـ المتحف المصرى الكبير كله،
لدرجة إنهم عملوا شكلها على عملات تذكارية من الذهب والفضة.
كرم:
يعنى بقت على فلوس كمان؟!
منصور:
أيوه،
علشان تفضل دايمًا رمز للخلود.
منصور:
شايف يا كرم؟
المصرى القديم كان عبقري،
والمصرى الحديث كمّل الحكاية.
علشان كده الحضارة دى لسه واقفة لحد النهارده.
كرم:
وأنا فخور إنى مصرى.
منصور:
طيب يا كرم،
لو إنت مهندس، كنت تحب تبنى إيه جنب المسلة؟
كرم:
برج مراقبة أشوف منه كل التاريخ!
منصور مبتسمًا:
المرة اللى جاية أحكيلك بقى عن حاجة مصنوعة من الذهب،
وزنها 11 كيلو ذهب.
كرم بحماس:
ياااه! كل ده دهب؟ طيب قولى دلوقتى،
أنا مش همشى إلا لما أعرف إيه هى!
منصور:
المرة اللى جاية.
منصور وكرم
