منصور وكرم فى المتحف المصرى الكبير

منصور وكرم في المتحف الكبير ــ 1

كرم طفل صغير يدخل من البوابة الرئيسية للمتحف المصري الكبير 

منصور:
صباح النور

أهلا وسهلا بيك فى المتحف المصرى الكبير.

وأهلا بالقطة الجميلة دى.. اسمها إيه؟

كرم:
مساء النور حضرتك مين؟

منصور:

اسمى منصور

بشتغل مرشد سياحي وأنت؟

كرم: 

أنا كرم

منصور:

اسم جميل

قولي بقى يا كرم، إنت جاى النهاردة ليه؟

كرم:

طلبت من بابا وماما يجيبونى المتحف وهما رايحين 

الشغل ويسيبوني لحد ما يخلصوا وعلى فكرة هما قريبين من هنا

وده علشان بحب أشوف الحاجات المصرية القديمة

التماثيل والحاجات اللى كانوا بيستخدموها زمان.

منصور:

وأنا مهمتى النهارده إنى أفرجك على قطع أثرية كتير،

وكل قطعة ليها قصة..
قصة تحكى عن ناس عاشوا هنا من آلاف السنين.
كرم بحماس:
بجد؟
يعنى كل قطعة هتحكى لى حكاية؟
منصور:
بالظبط.
بس قبل ما نبدأ حكايات القطع،
لازم الأول أحكيلك قصة المكان نفسه..
المتحف اللى إحنا واقفين فيه دلوقتى.
موافق؟
كرم:
موافق جدًا جدًا يا عمو.. يلا احكى لى.
منصور:
من زمان أوى،
كان عند مصر حلم كبير..
حلم إنها تعمل متحف ضخم
يجمع كنوزها القديمة كلها فى مكان واحد.
وفى سنة 1992،
اختارت مصر أرض كبيرة أوى
قريبة من أهرامات الجيزة
علشان تبنى عليها المتحف ده.
وبعد شوية، وبالتحديد سنة 2002،
اتحط حجر الأساس،
يعنى أول طوبة فى حلم كبير.
كرم:
يعنى المتحف اتبنى واحدة واحدة؟

منصور:

آه يا كرم، بالظبط كده.
وفى سنة 2003،
مهندسين من بلاد مختلفة صمموا شكل المتحف
علشان يبقى حديث،
وفى نفس الوقت يحترم الحضارة القديمة.
وبدأ الشغل بجد،
وفى سنة 2010،
اتفتح مركز الترميم،
وهو مكان مخصوص للحفاظ على الآثار.
كرم مندهشًا:
يعنى بيصلحوا التماثيل كمان؟
منصور:
طبعًا،
زى الدكتور لما يعالج المريض،
بس هنا بيعالجوا الآثار.
وفى سنة 2018،
دخل المتحف تمثال ملك عظيم جدًا،
تمثال الملك رمسيس الثانى،
ووقف فى قلب البهو الكبير.

وفى سنة 2023،
اتفتح جزء اسمه «الدرج العظيم»،
وفى سنة 2024،
الناس بدأت تدخل وتشوف قاعات كبيرة
فيها كنوز لا توجد إلا فى مصر.
كرم:
طب والمتحف اتفتح بشكل كامل إمتى؟
منصور:
فى سنة 2025،
وبقى أكبر متحف فى العالم
مخصص لحضارة واحدة،
يحكى حكاية مصر
من أول الزمان
لحد النهارده.
منصور بابتسامة مشوقة:
ودلوقتى بقى..
جاهز نبدأ أول حكاية عن قطعة أثرية؟
كرم بحماس:
جاهز يا عمو منصور!
منصور:
بس خليها المرة الجاية..
وهحكيلك عن أول مسلة معلّقة فى التاريخ.
كرم مبتسمًا:
خلاص.. اتفقنا.

منصور وكرم ونيبو