حكايتك يا مصر للشاعر عبد الله حسن قصيدة بمناسبة ذكرى انتصارات أكتوبر

ألقى الشاعر عبد الله حسن في عام 2021، قصيدة بعنوان «حكايتك يا مصر» حول نصر أكتوبر المجيد، خلال فعاليات الندوة التثقيفية الـ34 للقوات المسلحة المصرية، بمناسبة الاحتفال بذكرى نصر أكتوبر العظيم، والتي بثت على الهواء مباشرة وحملت اسم «العبور إلى المستقبل».

قصيدة حكايتك يا مصر

الصبح طالع علينا بركة.. وعلى العدو النور مخيف
أبويا بيلمع بيادته.. وأمي بتسوي الرغيف
والحزن له دراعاته.. خدنا ابن الأبالسة من قبل 6 سنين وقعنا ودقنا نكسة
الضهر أدن في الجوامع.. والكنايس يزأروا
الناس بتسأل في الشوارع.. امتى وطني نحرره
الجندي واقف كان يادوب.. لو مد ايده يسد عين الشمس سد
كان الجبان المرتعش.. كان مستخبي في ضهر سد
كان النهار لما انتصف.. صليت عشان وطني اتنصف
الشمس حارقة والصيام حامي.. اثبت يا أبويا ربنا حامي
ابدأ اشارة وابتدى يتكلم.. الله معاكم رد قاله تمام يا أفندم
شوف مصر ايه محتاجة وأنا جاهز.. وبكل ذرة رمل من سيناء هقدم روح
حالف يا هرجع للعيال فايز.. ويا إما هرجع في الكفن بلا روح
الصحرا واسعة في أواخر الصيف.. أول تحدي أعدي من بارليف
وأفرض قلوعي على القنال.. وأعدي أجيب اللي سرق بلدي وأحيي على القتال
وأبويا واقف منتظر.. ساعة ما قالوا هجوم
القلب كان بره الضلوع.. بيبوس ترابك يا بلد
لأ متخفيش واتطمني.. ربك خلقني منتصر
ساعة الخطر هاتوا الألم يفنى البدن.. يبقى الوطن تبقى بلادي
أرضي بتوحشني.. وطال ليه البعاد
ما أنتي غايتي والمراد.. وعلى كل العباد
كم لنيلك من أيادي.. الطيارات من فوق ومزيكا
بتعزف في النشيد.. الله أكبر صرخة واحدة
وابتدا العداد يعد.. هنا ارتفع جسد الشهيد
يرمي سلام من الطيارات.. اوعوا تقولوا على اللي راح
يفدي البلد ويضحي مات.. الدبابات بتعدي من فوق القنال
شايف ملايكة محاوطة علمك.. والعزيمة قادرة على هد الجبال
وقف التاريخ لحظة قصاد المعجزة.. مصر العظيمة بتدي للظالم جزا
كبروا وصلوا وسموا.. على اللي شربت أرضي دمه
واللي ردوا لنا الحياة.. في عيون سهرت ما نامت
لما قالوا الحرب قامت.. جينا من كل اتجاه
دم أبويا حبر خطي كنت لسه يا دوب بخطي.. ومصر بتقولي انتباه
يا تاريخ تعالى دلوقتي.. وقولي احنا مين
اللي عبروا شكلهم شكل اللي ضحوا.. كلنا في القوة مصريين
لما كان الأرض يوزنها الجبال.. إحنا أرض بلدنا يوزنها الرجال
والرجال تحمي وتعمر.. الله أكبر لا تخافي ياللي شايلك فوق كتافي
ياللي سميتك وفية.. ياللي أخر نبض فيكي هو أخر نبض فيّ
يا عظيمة يا أبية يا اللي جندك ليكي فخر.. هم دول ناس يا بلدي
وهي دي حكايتك يا مصر.. هي دي حكايتك يا مصر.