النائبة عبير عيسوي: ملف المعاشات أولوية.. وأنصح الشباب بالمشاركة السياسية

أكدت الدكتورة عبير أحمد فؤاد، الشهيرة بعبير عيسوي داوود، بعد استلام كارنيه عضويتها في مجلس النواب الجديد 2026/2031، على شعورها بالفخر والمسؤولية تجاه المواطنين، مشيرة إلى التزامها بدعم قضايا المواطن ومتابعة ملفات المعاشات، قوانين المرأة، التعليم، وتمكين الشباب.

وأوضحت أن المشاركة السياسية فعل مهم ومفتاح لأي تأثير حقيقي، وأن من يكتفي بالاعتراض أو المشاهدة من على الهامش، مثل ما يُعرف باسم "حزب الكنبة"، لن يجد فرصته في صناعة القرار، موضحة أن كل جهد سياسي حقيقي يمس حياة الناس ويحقق العدالة والاستقرار.

وعن شعورها باستلام الكارنيه، قالت عبير: شعور كبير جدًا، فيه فخر ومسؤولية، الموضوع مش مجرد كارنيه، ده بداية عهد لخدمة المواطنين بجد، كل قرار داخل المجلس هيمس حياة ناس حقيقية، حاسة إني مكلفة أكون صوت لكل أب وأم ولكل شاب عايز يبدأ حياته بثقة.

وتطرقت عبير لرأيها في وجود عدد من النواب الذين تجمعهم صلة قرابة فى البرلمان، قائلة:" فيه عائلات بتحب السياسة وبتشارك، وفيه عائلات مش مهتمة، الفرق كبير بين اللي بينزل ويجتهد وبين اللي يقعد على الهامش، المشاركة مش اسم ولا أصل عائلي، دي ممارسة فعلية لحقك الدستوري، اللي يهتم بالسياسة هيلقى فرصته، واللي يقعد على "الكنبة" ويعترض من غير أي عمل مش هيشوف نتيجة".

وحذرت عبير من "حزب الكنبة" بشكل مباشر، موضحة: الناس اللي بيتبعوا حزب الكنبة دول اللي مش بينزلوا الانتخابات ولا بيشاركوا بجد، بس دايمًا بيعترضوا على كل حاجة من غير أي جهد حقيقي، للأسف ده بيخليهم يضيعوا فرصتهم في التأثير السياسي، رسالتي لكل المواطنين:" متبقوش زي حزب الكنبة، انزلوا، شاركوا، مارسوا حقكم، وهتلاقوا فرصكم في العمل السياسي وصناعة القرار، المشاركة الحقيقية بتفرق جدًا وبتدي القدرة على التأثير".

وعن أهم الملفات التي ستركز عليها، قالت عبير:" أول حاجة المعاشات، لأن كتير من المواطنين بعد المعاش بيلاقوا معاشهم مش كافي وبيستمروا في دعم أولادهم كمان قوانين المرأة والتعليم على رأس أولوياتي، لإنها مرتبطة بتوفير فرص شغل حقيقية للشباب وتمكين المرأة. بالإضافة لكده، هختار لجنة المشروعات الصغيرة عشان أقدر أساعد الشباب يبتدوا حياتهم العملية بثقة".

وعن تمكين الشباب، أكدت عبير: الشباب هم مستقبل البلد، عايزة أساعدهم يبتدوا حياتهم العملية بمشروعات صغيرة وفرص شغل، وكمان برامج تعليمية ومهنية تساعدهم يبنوا مستقبلهم، المشاركة السياسية مش بس للكبار أو العائلات التقليدية، الشباب لهم فرصة يكونوا صناع تغيير لو مارسوا حقوقهم، الدعم الحقيقي للشباب يبدأ بالتعليم وتمكينهم اقتصاديًا، وده هيساعد المجتمع كله يكون أكثر عدل واستقرار.

ووجهت عضو مجلس النواب، رسالة للمواطنين قبل بدء الفصل التشريعي الجديد: انزلوا، شاركوا، متبقوش متفرجين أو بتنتقدوا من على الهامش زي حزب الكنبة، حقك السياسي مش بس للشكوى، ده عشان تقدر تأثر وتشارك في صناعة القرار، كل جهد حقيقي هيأثر على حياة الناس مباشرة، وهدفنا نخدم الوطن وأهله وناسه بكل أمانة ومسؤولية.