مشجع الزمالك الباكى: انهرت بعد هدف تريزيجيه والزمالك حياتى كلها.. فيديو

قال زياد رضا مشجع الزمالك الباكى عن كواليس "اللقطة التريند"، خلال القمة الـ 131 للأهلى والزمالك، أنه شعر بالإحباط بعد جول ترزيجيه الثانى للأهلى خاصة، وأن الزمالك كان هو المتقدم.

وأضاف خلال مداخلة هاتفية لتليفزيون اليوم السابع مع نورهان طمان، "احنا كنا كسبانين ومحتاجين نضغط أكتر لكن اللعيبة معملتش كده، وكنت في الأول واثق من الفوز قبل الماتش، وكنا متقدمين لكن المدرب مكملش ضغط وكان نص الملعب عندنا مفتوح للأهلى".

وتابع زياد، "كان عندى أمل نجيب الجول التانى ، لكن لما دخل فينا الجول التانى من الأهلى حسيت المباراة هربت مننا والمدرب مقدرش ينظم المباراة وخط الوسط بتاعنا مش قوى والأطراف كمان بتاعتنا ماشتغلتش فى معظم أوقات المباراة"

وعن لقطة البكاء قال " فضلت أشجع فريقى لحد ما انهارت وعيطت وظهرت في اللقطة وأنا بعيط".

وأكد زياد، حبه وعشقه لنادى الزمالك، قائلا" بعيدا عن البطولات حياتى كلها عبارة عن نادى الزمالك، الزمالك إكتر حاجة بحبها في حياتى ومتعلق بيه فى حياتى، وأنا مش بشجعه عشان ياخد بطولات أنا بحبه، وجمهور الزمالك معروف عنه صبره وحبه لناديه، و دايما وراه في الخسارة والفوز".