فؤاد حداد يرثى جمال عبد الناصر.. مع السلامة يا والد يا أحنّ شهيد

تمر اليوم ذكرى رحيل  جمال عبد الناصر، في يوم 28 سبتمبر من عام 1970، وهو الحدث الذي مثل صدمة كبرى للجميع، وقد تأثر الشعراء بهذا الحدث ورثوه، ومنهم الشاعر فؤاد حداد في ديوان له بعنوان "استشهاد جمال عبد الناصر" ومما جاء فيه:

استشهاد جمال عبدالناصر.. فؤاد حداد

يا حضن مصرى يا طلعة فجر يا ريّس
مع السلامة يا والد يا أحنّ شهيد
آدى الرقابى ودى الأعلام بتتنكـّس
فين طـلـّتك في الدقايق تسبق المواعيد
والابتسامة اللى أحلى من السلام بالإيد
يامعانا في كل فرحة ومعركة وجديد
أؤمر لى بحقوقى وهدوم الولاد في العيد
والمجانيّة ومرايل بيضا والأناشيد
والصبر ما يغلبهش الذلّ والتنهيد
فرّقت ورقك وقلت الكلّ يكتب لى
من البحيرة من الشرقيـّة من قبلى
أنا خفت لو أم تنده وتلاقينى بعيد
ياما السفر والبريد ياما الأمل بدرى
ياما الغلابة تريد منشيّة البكرى
وياما قلبك خفق من رحمته وضناه
كل الآهات شعب واحد يا حبيب الله
يا صادق العقل واكتاف الفواعـليّه
صدر الشهامة اللى أكبر منها حنيّه
نسّيتنا أيّام ما كانت راسنا محنيّه
آدى المدارس ودى الشوارع ودى العمال
والفـلاحين الأحبّه أمّتك يا جمال
داوم على الحق ياكبير العرب داوم
عشر ليالى بضحاها وانت مش نايم
خلـّينا نعلى بحناجر تطلبك ودموع
يا قوة الشعب يا قلب الوطن مسموع
يا رؤية الذاكرة يا واحد الجماهير
صوتك نبع من نبات نادى وشرف وضمير
من ملحمة ومن دموع زى النهاردا كتير
خلينى أسأل دموعى قبل ما اكتبها
وليل ما كانش انتهى وأيّام نعتـّبها
واسمك يدور في المناره خالد الإحساس
مين اللى أكبر مقامك في قلوب الناس
إلا مقامهم في قلبك