خلافات زوجية انتهت بالقتل.. حكايات مأساوية هزت بيوت مصرية.. فيديو

قدم تليفزيون اليوم السابع فيديو خاصا عن سلسلة جرائم شغلت الرأي العام في مصر خلال الفتره الأخيرة، والتى حدثت نتيجة خلافات زوجية ثم انتهت بقتل الزوج أو الزوجة أو حتى الأطفال، ثم تخلص القاتل من حياته.

في الدقهلية، أب أنهى حياة أولاده التلاتة وطعن مراته أكتر من 10 طعنات بعد ما طلبت الطلاق، وكتب على فيسبوك نعي لأولاده قبل ما يرمي نفسه تحت القطر.

وكانت الصدمة الأكبر كانت تسجيل صوتي للأب بيكلم جدة العيال وبيقولها: "محمد ومريم ومعاذ ماتوا في الشقة.. روحي لهم هناك"، وصوت الجدة وهي بتصرخ هز قلوب الناس، والأب لم يرجف له جفن.

وفي المحلة الكبرى، مشادة بين جزمجي ومراته انتهت بجريمة قتل بشعة.. الراجل مسك سكينة المطبخ وطعن مراته قدام ولادهم الاتنين، الأم وقعت غارقة في دمها وماتت، والجيران بلغوا الشرطة لكن الزوج هرب.

أما الإسكندرية، فكانت الجريمة أبشع.. أب استدرج بناته الاتنين لبيته في العامرية، وطعن بنته الكبيرة "رويدا" لحد ما ماتت، وحاول يقتل التانية رقية لكن قدرت تهرب لجيرانها بعد ما اتصابت‘ بعدها الأب طعن نفسه بسكين ومات.

وفي المنيا، زوجة شابة أنهت حياة جوزها و6 أطفال بالسم بسبب غيرتها من ضرتها. الزوجة التانية عرفت إن جوزها هيرجع لمراته الأولى، فحطت السم في الأكل. الاب والأطفال ماتوا واحد ورا التاني، والزوجة حضرت الجنازة بدموع تمساح علشان محدش يشك فيها. وقدام المحكمة، لما القاضي سألها ليه عملت كده، ردت: "علشان ضرتي كانت هتخلي جوزي يطلقني".

سلسلة الجرائم دي فتحت من جديد النقاش عن خطورة الخلافات الأسرية لما بتتحول لكوارث دموية جوه البيوت بدل ما تفضل مجرد مشاكل عادية.