مشغول أم غير مهتم؟ مذيعات "ست ستات" في مواجهة ساخنة حول لغز الرجل الغائب

شهدت حلقة الجمعة من برنامج "ست ستات"، المذاع على فضائية دي إم سي ، نقاشًا ساخنًا وجدلًا واسعًا حول المقولة الشهيرة "ما فيش راجل مشغول، لكن فيه راجل مش مهتم"، حيث انقسمت آراء المذيعات الست بين من يعتبرها حقيقة مؤكدة لا تقبل الشك، ومن يراها مقولة ظالمة تحتاج إلى مراجعة.

دار الحوار ليكشف عن وجهات نظر متباينة تعكس تجارب ومواقف مختلفة، ليتحول الاستوديو إلى ساحة نقاش حقيقية تمثل ما يدور في أذهان الكثير من النساء.

وقالت الإعلامية سناء منصور: "اخيرا جه الميعاد المنتظر يوم الجمعة الساعة 6، عشان التقي بزميلاتي العزيزات ونكون معاكم في ست ستات. من الاسبوع للاسبوع بستنى الحلقه دي، لان ليها طعم ثاني وروح ثانيه، ودايما بنحاول نختار مواضيع تهمكم وبنطرحها للنقاش من وجهات نظر ست ستات. ان شاء الله هتعجب حضراتكم."

وعلقت الإعلامية آية جمال الدين: "النهارده معانا موضوع انا شخصيا عجبني قوي. ما فيش راجل مشغول لكن في راجل مش مهتم. الجمله دي بنشوفها كتير على السوشيال ميديا وبنسمعها كمان من ستات وبنات على انها حقيقه مؤكده. ودائما بيتقال كده ان اللي بيحبك هيلاقي وقت عشانك مهما كان وراه. ما فيش حاجه اسمها مشغول بس يا ترى الكلام ده صح بالضروره، يعني دي حقيقه مسلم بيها فعلا ولا مقوله خاطئه محتاجه مراجعه واعاده نظر."

وقاطعت الإعلامية نهى عبد العزيز: "أكيد حقيقة مؤكدة! طب عايزة أقولكم على حاجة، مهما كان الراجل مشغول لو مهتم هيخلق لك وقت من تحت الأرض. زي كده ما كان بيلاقيكي زمان زمان وقت أول ما اتعرفتوا وحتى المشغول ما هو بيرد يقول ألو أنا مشغول، يبعت رسالة، هكلمك بعدين، يديكي ميعاد، يرتب معاكي جدول حسب مواعيده طبعًا مش حسب مواعيدك انتي، إنما المشغول كده على طول تتصلي بيه بقى ما يردش، تكتبي له ما يعبركيش، يبقى أكيد أكيد ده راجل مش مهتم."

وقاطعت الإعلامية سناء منصور: "شفتوا الإجابة السريعة بتاعتنا؟ ما حصلتش! الحماس باين عليها يعني ما شاء الله من أوله كده. إحنا لسه بنقول بسم الله الرحمن الرحيم، نهى انطلقت صاروخ!".

وقالت الإعلامية سالي شاهين: "للأسف يا سنسن أنا مش متحمسة كالعادة، لأني شايفة بمنتهى الصراحة إن الكلام شوية فيه مبالغة وإنه كلام بيعمل تريند على السوشيال ميديا. يعني حتى بلاقي لايف كوتشز رجالة بيطلعوا يقولوا الكلام ده علشان إحنا كستات إحنا عايزين نصدق الكلام ده. ومش بالضرورة خالص إن الراجل لو مشغول إنه يقدر يلاقي يا نهى وقت علشان يرد عليا ويكلمني. يعني مثلًا لو راجل طيار هيكلمني إمتى والراجل سايق الطيارة؟ راجل في حقل بترول ما عندوش وقت يرد عليا. زي ضيفنا النهارده اللي هيكون معانا كمان شوية المخرج مجدي أحمد علي، المخرجين بيقعدوا يشتغلوا بالـ 30 ساعة مفيش وقت يرد عليكي. أنا مبقولكيش إنه لو كان مثلًا طالب في الجامعة آه ده عنده وقت يا حبيبي... بس إحنا لازم نفكر فيها ونوازنها."

وتدخلت الإعلامية جاسمين طه زكي : "على رأي العندليب، مشغول وحياتك مشغول. بصوا بقى السؤال ده على فكرة صعب بجد إن الواحد يجاوب عليه بسرعة، محتاج تفكير وتفكير كمان عميق. وأنا بعتبر نفسي يعني إني عاقلة ورزينة وبحب أوزن الأمور كده وأفكر بمنطقية وعملية، لكن في الحتة دي تحديدًا حاسة فعلًا إنه مهما كان الراجل مشغول هيلاقي للست اللي هو بيحبها ومرتبط بيها وقت، وإن أي ست هتقدر إنها تميز وبسهولة جدًا إذا كان جوزها أو خطيبها فعليًا مشغول ولا بجد هو مش مهتم بيها؟".

وقالت الإعلامية شريهان أبو الحسن: "بصي، هو المشغول بيتعرف، واللي مش مهتم بيتعرف. في رادار كده بنعرف نفرز بيه. والحقيقة هنا المعيار مش الراجل لكن الست. الاهتمام ونوعه ودرجته دي مشكلة ستاتي جدًا، مشكلتنا إحنا كستات. إحنا اللي الحب والاهتمام عندنا مفهوم واحد مش منفصل. يعني حب يعني اهتمام. والاهتمام بالنسبة للست مش بييجي بالمناسبة، لأ دي عملية متصلة متواصلة، مفيش اهتمام يبقى مفيش حب."

وقالت الإعلامية آية جمال الدين: "أنا شايفة إن ده طبيعي ومنطقي، لأنه الراجل أصلًا عنده غريزة الصيد، تلاقيه في البدايات مهتم أوي مغرقها اهتمام... فالست يا عيني غلبانة تفتكر إن ده العادي بتاعه وإنه هيفضل كده على طول، ده فخ، أكيد مش هيفضل كده. فالاهتمام هي بتقول لنفسها الاهتمام ما بيتطلبش، لأ طبعًا هو بيتطلب عادي. لما يقولك مشغول تقول أصله مش مهتم، بس أنا شايفة إنه لأ عادي مش بالضرورة خالص إنه يكون مش مهتم."

وردت الإعلامية سناء منصور: "بصوا بقى هو الاهتمام الحقيقة مطلوب من الطرفين. كل واحد لازم يحس إن الشخص الآخر اللي قدامه مهتم بيه. مفيش كتالوج... هو إحساس داخلي. بس اللي بيطمن الست حقيقي هو إنها تبقى عارفة إنها لما هتحتاج له هتلاقيه وهتعتمد عليه. وقت الجد عارفة إنه موجود. ولما يعرف إنك محتاجاه بيسيب كل اللي في إيده على فكرة، أنا بكلمكم بجد، أيًا كان هو إيه ويجيلك."

وقالت الإعلامية نهى عبد العزيز: "صح يا أستاذة سنسن، أنا موافقاكي والله. بس خلوني أقولكم على حاجة مهمة، ساعات يا جماعة في رجالة بتوصل الست إنها حتى لو محتاجاه مش هتفكر حتى إنها تدور عليه لأنها عارفة ومتاكدة إنه مش هيهتم. تعالوا نشوف رأي الناس اللي في الشارع نعرف رأيهم إيه في الموضوع ده، هو مشغول ولا مش مهتم؟"