شريهان أبو الحسن في "ست ستات": زوجة تتمنى أن يسافر زوجها يومين بس علشان ترتاح

قالت الإعلامية شريهان أبو الحسن، إن المعتاد في الشكاوى الزوجية هو أن النساء يشتكين من غياب الأزواج وانشغالهم عنهن، لكن المختلف هذه المرة أن زوجة في الأربعين من عمرها، متزوجة منذ 15 عامًا، تشتكي العكس تمامًا: "بتتمنى إن جوزها يخرج من البيت أو يسافر لها يومين، بس علشان تقدر تاخد نفسها!".

وأضافت شريهان خلال تقديمها حلقة من برنامج "ست ستات" المذاع على قناة "DMC": "الزوجة دي عندها اتنين أولاد، وجوزها راجل طيب ومحب وناجح في شغله، بس مش بيسيبها دقيقة لوحدها.. لا بيخرج من غيرها، ولا حتى بيسيبها تروح لأمها لوحدها، ولا ترد على مكالمة طويلة، ودايمًا حابب يكون معاها في كل لحظة."

وتابعت: "هي مش بتشتكي من قلة حب أو اهتمام، بالعكس، هي شايفة إن زوجها بيحبها بزيادة، بس المشكلة إنه مش بيدّيها أي مساحة لنفسها، لا وقت خاص، ولا خروجة مع صحابها، ولا حتى وقت تقعد فيه مع نفسها من غير ما يسألها: إنتِ فين؟ راجعة امتى؟"

وأشارت الإعلامية إلى أن الزوجة حاولت تشجّعه يخرج مع أصحابه أو يسافر لوحده، لكن مفيش حاجة بتفرّقه عنها، لدرجة إن صحباتها وأخواتها بطلوا يعزموها علشان دايمًا معاها زوجها.

واختتمت شريهان أبو الحسن بطرح تساؤلات مهمة: "هل الست مالهاش حق في مساحة شخصية؟ هل دايمًا الراجل بس هو اللي عنده حق يطلب وقت لنفسه؟ وإمتى نبدأ نفهم إن حتى الزوجة، وسط كل ضغوط البيت والعيال، محتاجة ساعة لنفسها؟"