السابع على الجمهورية علمى علوم: "النجاح محتاج فهم مش حفظ.. والتوفيق من ربنا"

عبّر الطالب عبد الرحمن شوقى، الحاصل على المركز السابع على مستوى الجمهورية فى شعبة علمى علوم، عن سعادته الكبيرة بالإنجاز الذى حققه، موجّهًا الشكر لأسرته وكل من دعمه طوال العام الدراسي.

وقال عبد الرحمن، خلال مداخلة هاتفية مع الإعلامية مروة شتلة، ببرنامج "البيت"، المذاع على قناة الناس، اليوم الأربعاء: "كنت متوقع أجيب مجموع عالى أن شاء الله، لكن فكرة إنى أكون من الأوائل كانت مجرد احتمال، مش يقين. التوفيق من عند ربنا أولًا وأخيرًا، حتى داخل اللجنة".

وعن طريقته فى الاستعداد للثانوية العامة، أوضح عبد الرحمن أن سر النجاح يكمن فى الفهم لا الحفظ، قائلًا: "كنت بحاول أستوعب المنهج قدر الإمكان وأفهم المواد بعمق، مش مجرد حفظ وخلاص.. اللى مش فاهمه أحاول أرجع له، وأحل كتير، لكن بفهم مش بتكرار".

وأشار إلى أن إدارة الوقت والمذاكرة الهادئة من العوامل المهمة: "كنت بحاول أشتغل على المنهج براحة، من غير توتر، أفكر وأنا بذاكر، وأفهم كل نقطة كويس.. اللى يتعامل مع المادة على إنها شيء لازم يفهمه، هيوصل بإذن الله".

وعن طموحه المستقبلى، كشف عبد الرحمن عن رغبته فى دخول المجال الطبى ولكن برؤية مختلفة، قائلًا: "أنا مهتم بالمجال الطبى، بس بطريقة مختلفة شوية عن التقليدى، عايز أدرس حاجة أقدر أكون مميز فيها وأسهم بشكل مفيد فى المجتمع".

ونصح طلاب الثانوية العامة المقبلين على الامتحانات: "مافيش حاجة مؤكدة 100%، لكن خذ بالأسباب، وذاكر بتركيز، وافهم مش تحفظ، وسِب الباقى على ربنا".

https://youtu.be/PjNQbtyDwUg?si=ZKi3I4WgqTpRXxy3