يستعد بيت الشعر العربى، بإدارة الشاعر سامح محجوب، على مدار يومى 17 و18 مايو لتقديم (ملتقى بيت الشعر العربى الأول.. للنص الجديد)، ويدعو فيه 50 شاعرًا، تحت سن الأربعين من جميع ربوع مصر، وذلك للمشاركة فى الملتقى، وسيقوم "اليوم السابع" بنشر قصائد الشعراء تباعًا..
قصيدة لـ "أحمد جمال نور الدين"
"زاهد"
زاهد بقلب ملوش نصيب ف اللُقا
بترد فيه الروح..بيرد فيها الشقا..
الضحكة للمحروم..
عاملينها ع الضيق.
وانا كنت مش معزوم..
ماسك في طرف هدوم..كل اللي مزّعني..
مش قُرصة للمرحوم.. لكن بَوزعني..
رحمة ونور ع الكل...
وكفوفي بيحيوا..
أنا كنت زي الفل..
دلوقتي مش زيه..
زاهد..
في علّة قلبي شئ م الدوا
حامل شهادة سير بعِلم الهوى..
إنسان في وصفي..من اللي حب ونوى
صحفي من اللي يدسِّـــك النونوة..
ميحبنيش الفكر ف التعقيد..
ميحبنيش الشعر ف التمجيد..
متودنيش اللمّة.. يعني وحيد..
ولا عمري قلت بحب.. إلا بخوف..
اسمع لقلبي ف توهة.. لما يشوف..
ف الشدة كنت أنا ببقى حتة صوف..
ستر وغطا اللي يعوز..
ف القعدة كنت أنا ببقى ضحكة تبان..
لما المحبة تجوز ..
بالعمر شاب وباللي عيشته.. عجوز..
أحلم..
تاخدني لبكرا جـــيّــاتي..
أبكي إنما .. مكشفش أناتي..
أخفي..
ف عيني تشب نياتي..
وأفضل كدا حضن اتوهب واتصد..
زاهد ..
وقلبي اللي بينده عاش تعيس الرد..
أحمد جمال نور الدين
أحمد جمال نور الدين
شاعر، إصدارات سابقة في شعر العامية هي:
ديوان بالعامية المصرية بعنوان "إللي جاي سحلة" إصدار عام 2015.
ديوان بالعامية المصرية بعنوان "كرسي بعجل" إصدار عام 2019.
ديوان بالعامية المصرية بعنوان "يا معافر وحدك" إصدار عام 2021.
ديوان بالعامية المصرية بعنوان "الرؤيا" إصدار الهيئة المصرية العامة للكتاب عام 2022
