الجدار.. قصيدة محمد مجدي بملتقى بيت الشعر العربي للنص الجديد

يطلق  بيت الشعر العربى، بإدارة الشاعر سامح محجوب، اليوم، وعلى مدار يومين ( 17 و18 مايو) ملتقى بيت الشعر العربى الأول.. للنص الجديد)، ويدعو فيه 50 شاعرًا، تحت سن الأربعين من جميع ربوع مصر، وذلك للمشاركة فى الملتقى، ويقوم "اليوم السابع" بنشر قصائد الشعراء تباعًا..

بيت الشعر العربي

الجدار..  لـ محمد مجدي

غزو من جهتين
….
هل كان طبيعي أحضن الوردة
في ساحة النزال؟
وهل شرف للوردة
تطلع كمين
وحدي.. طعني الشك
وقسمني اليقين
وكأني أرض المعركة وحدي
والعدو في الجبهتين.
......
(١)
معاهدة غير ملزمة لطرفين
......
هنا.. وبعد المعركة بالذات
كان شيء طبيعي ننقسم لاتنين
ماكانش يوجعني أكون مهزوم
وجعني شيء واحد
نتسمى شيء واحد
                           (محتل)
...
ماترفعيش عينك
وانا باختل
خليني أرجع للجدار
عريان وعرقان
زي طمي اخضر وني
مابين ضلوعي خرايط
للهزيمة والوهن
وف ضهري صوتي
وقت ما اشتد النزال
           _ فداك دم ونفس_
            ولو لآخر نفس
عطشان..
وجوفي أودية من رمال
الشمس خلفي ضيها كالنبال
شايل عدوي تحت جلدي
بنزفه في الخيال
وخطوتي بتشدها الذاكرة
ليه اللي باقي من حطام السور
ماخباش الحريق؟
……..
(٢)
(دخول من جهتين)
......
شوفيني ندل
كأني إنسان أو إله
_لأني في الحالتين هغيب
ولو ف وسط المعركة
شوفتي الخيول بتدوس جبيني
ويشقني نصل الهزيمة
ماتبكنيش وكأني فارس نبيل
وإذا انتصرت ماتحرقيش البخور
وتغزلي إكليل
_لأن مش غرضي الدفاع عنك
وعنهم_
ولا عن جدار الحصن
والإرث القديم
ولا حتى عني..
لما سربلني الإيمان في ساحات النزال.
أنا دخلت المعركة ضدي
وضد صوتي
لما وزعت الحماسة ع الصفوف
"الموت شرف"
وصدقت السنابل
.......
٣
هزيمة
______
أنا انتظرتك
وانت خنتي انتظارك
وقفت وحدي على العهود والهزيمة
زي الجدار اللي باقي من حطام السور
شبكت كفي بالفراغ من الناحيتين
ودفنت صورة الحصن في الذاكرة
يكفيني لو مرت عليا الريح
يطير رماد المدينة
إلا من خلفي
كأني باقي ع الأثر
ودم سايل ع الحجر والرمال
كنا ف وسط الحرب
قابضين ع الحماسة
بنضمد الجرحى سويا بالكلام
وبالأغاني اللي اخترعها البنايين
وهما بيرصوا الحجارة ع الحدود
يومها افتكرتك
واحنا شايلين الحجر
وكأننا حاضنين وطن واحد
ضحكة عنيك لما بوستك
والعرق ملح ف عنينا.. والتراب ع الكف
ماكنتش اعرف لما غمضنا
إني هاغرق في الزمن وهاشيخ
فتحت عيني
ولا فتحت الجراح ع الملح
ضهرك ف ضهري
واحنا ساندين ع الهزيمة
وساترين الخيانة عن الصفوف

محمد مجدي

محمد مجدي

شاعر..  حاصل على ليسانس الآداب في الدراسات الفلسفية
صدر له عدة دواوين
- أعمى بيوزع بصيرة 2011
- تلاوة في كتاب السامري 2014
- نافخ البوق (ملحمة شعرية الكتاب الأول)
وله العديد من الأعمال تحت الطبع.. منها
نافخ البوق (الكتاب الثاني)
ديوان (كتابي ـ القاهرة ١٩٨٦)