غلطة الترجمة.. قصيدة ناصر عبد السلام فى ملتقى بيت الشعر العربى للنص الجديد

يستعد بيت الشعر العربى، بإدارة الشاعر سامح محجوب، على مدار يومى 17 و18 مايو لتقديم (ملتقى بيت الشعر العربى الأول.. للنص الجديد)، ويدعو فيه 50 شاعرًا، تحت سن الأربعين من جميع ربوع مصر، وذلك للمشاركة فى الملتقى، ويقوم "اليوم السابع" بنشر قصائد الشعراء تباعًا..

بيت الشعر العربي

غــلـــطِةْ التَّرجــمـــة لـ ناصر عبد السلام

..
يمكن العصفور ع الشجرة نازل شتيمة
وانا كنت فاكره ف الصبح طالع يغني!
يمكن "بحبَّك" مش اَول كلمة نعرفها
وكان قبلها بكتير "الخير.. ف البُعد عني!"
يمكن حاجات ياما...
الغلطة.. غلطة مين؟
خلتنا نصنف الأشياء شمال ويمين:
(دي دمعة فرحانة،
ودي ضحكة متأزِّمة)
الغلطَة دي..
يا حبيبتي مش غلطتنا..
دي غلطِة الترجمة!

وياما غلطات الترجمة عملتها:
زي امّا نابنا البَلا واحنا دعينا.. بستر
وزيَّ الغلابة اللي قاموا - بكل - أدوار البطولة
وماجوش على الشاشة وماجوش كمان ف التتر!
كان نفسي أشوف غلبان ف الموتَ على سريره
مين اللي ترجم موتُه "مابين ضحايا القطر"؟

مين اللي ترجّم "قضية"
وخلاها "خيانة"؟
وغيره ترجم "خيانة" وخلاها "قضية"؟
مين اللي بيترجم طابور العيش ..
خلاه "طابور العيش"
مش كان "طابور العيش" ومعاه "فراخ جمعيَّة"؟
الترجمة ديَّا ..
خلتني أشك ف ذاتي وف أمي وأبويا
خلتني أشك ف إيماني وفي جدوى الهُويَّة
خلتني أقول - من غير ما تبكي عينيا -:
أنا كنت يمكن هاجي ..
طلقِةْ مسدس خرز
ف إيدين عيال ف العيد
أو زينَة فِي رمضان متعلقة ع الدور
أو كنت هاجي انسان ..
من أم تانية فِ «القاهرة/أسوان»
أو «بورسعيد/ طنطا»
لكِنّْ غلطة مترجم..
ودتني ل «دمنهور»

الترجمة خلتنا مانفهمش "إيه معنى الوطن؟"
مانحسبش الحسابات للزمن
مانفهمش الفروق ..
بين الكلاب البلدي وكلاب الحراسة
بين التاريخ الحقيقي واللي خدناه ف الدِرَاسة
الترجمة المغلوطة بتفسد المضمون
زي الشعور الجميل اللي كتبته ف الكُرَّاسة
وفقدته لمّا.. كتبته ع التليفون!

..
ياريت الترجمة تغلط - جديد - من تاني
وترد لينا الأغاني...
وترد اللي نايمين ف الشوارع.. للمباني
والراحة تبني العِش فِي قلب اللي خايف

ياريت الترجمة تغلط بجد ..
والرؤية تبني العش ف عيون كل شايف
فَ نشوف كُل بوسة وهي رايحة لخَد ..
مش غلطة.. بتروح ع الشفايف! .
**

ناصر عبد السلام

ناصر عبد السلام 

تخرج فى كلية اللغة العربية قسم التاريخ والحضارة بجامعة الأزهر
صدر له ديوان "لمبة وساعة رمل" بالعامية المصرية وحصل على جائزة أحمد فؤاد نجم 2024
حصل على المركز الأول على وجه بحري بالتصفيات المؤهلة لمسابقة إبداع الجامعات
نشرت له عدة قصائد بالأهرام والدستور وجريدة الحرية ومجلة الثقافة الجديدة
له ديوان "السهل الممنوع" ديوان تحت الطبع