علي جمعة: "ربنا كرمنا وتخلصنا من عشوائيات السكن.. وباقي عشوائيات الفكر"

أجاب الدكتور على جمعة، عضو هيئة كبار العلماء بالأزهر الشريف، ومفتى الديار المصرية الأسبق أسباب ظاهرة عشوائية التعامل مع العلم. هل العيب فى المؤسسات الدينية؟ هل العيب فى وعى الناس؟ وما علاج هذه الظاهرة؟.

وقال عضو هيئة كبار العلماء بالأزهر الشريف، ومفتى الديار المصرية الأسبق، خلال بودكاست "مع نور الدين"، المذاع على قناة الناس، اليوم الأحد: "لما حصلت أحداث سنة 2011، قعدنا واجتمعنا ولقينا أن مصر فيها 196 عشوائية، وقلنا السبب إيه؟ السكوت، أن الناس مشغولة فى حاجات تانية ومش واخدة بالها أن العشوائيات بتنتشر.. الحمد لله، قاومنا عشوائية السكن، ولغاية الآن لم ننتهِ منها تمامًا، لكن فى الجمهورية الجديدة بتاعتنا قضينا على العشوائيات، واستفدنا من تجارب أوروبا، وتجارب كثيرة فى الصين، واستفدنا، والحمد لله، ربنا مكّننا وخلصنا من العشوائيات، زى ما خلصنا من فيروس سي".

وتابع: "لسّه بقى، إحنا عايزين نتخلص من عشوائيات التديّن، وعشوائية الفكر، ده اللى ما مرّش على العلم، واللى خدها بصورة سطحية، واللى أصبح فى هذا… أدى التاريخ بتاعها، يمكن من التاريخ ده نعرف نحل، يمكن من التاريخ ده نرى إزاى موقف شيخ الأزهر لرفض أى محاولة للتعليم خارج الأزهر، لأنه مش تعليم، ده نشر ثقافة".

وأوضح: "فضيلة الإمام الأكبر دائمًا حريص جدًا على أن يقف بالمرصاد لكل محاولة لإحداث أزهر موازٍ، وهو ليس بأزهر، ده معمول كـ"مسجد ضرار"، فهذه العشوائيات هى مسجد ضرار بالنسبة لعلم الأزهر، لعمق الأزهر، ومنهجية الأزهر، وبرنامج الأزهر، الأزهر اللى فيه 103 دولة منسوبين إليه، وراء شيخ الأزهر، هيئة كبار العلماء كلها عن بكرة أبيها، ما فيش ولا واحد يقول له: يا مولانا، أنا مختلف معاك، ونرى أن الثقافة برضو كويسة وكذا، إلى آخره... أبدًا، ليه؟ لأننا عارفين التاريخ ده كله، عارفين محمد أبو زيد، وإيه اللى عمله، عارفين محمد نجيب، وإيه اللى عمله، عارفين الإخوة اللى ما فيش داعى لذكر أسمائهم حتى تتنزل الرحمات من اللى بيعملوه، كيف كانوا، وما هم عليه الآن".

وتابع: "أدى يا سيدى القصة بتاعة العشوائية، وهذه القصة لم نقلها عبثًا، هذه القصة من أجل العلاج، من أجل أن نعرف أثر هذا عبر التاريخ، فنعتبر ونرجع مرة أخرى إلى العلم".