طالبة تسأل: ينفع احرك صور الموتى بالذكاء الاصطناعى؟.. علي جمعة يجيب

أجاب الدكتور على جمعة مفتي الجمهورية السابق، وعضو هيئة كبار العلماء بالأزهر الشريف على سؤال طالبة: "لو فيه شخص ميت عزيز عليا.. وجبت صورته وعملتها بالذكاء الإصطناعي خلتها كأنها حية وتتحرك.. هل ده حلال ولا حرام؟".

وقال الدكتور على جمعة، خلال حلقة اليوم من برنامج "نور الدين والدنيا" الذي يقدمه على قنوات المتحدة: "هل هذا التحرك سيستعمل في توثيق حاجة.. هنقول مثلا هخليه يتكلم بأنه اوصي وصية قبل موته وهو لم يفعل ذلك وبقي فيه كذب وأكل مال الناس بالباطل لأن هذا التزوير ممنوع.. ونتأمل ونفكر مع بعض هل فيه منفعة.. لأنه الإجابة لو كان فيه منفعة عمله ولو مفيش منفعة مش نعمله.. ودي حاجات جديدة على الجيل الحالي".

وتابع: "ما الهدف من تحريك صور المتوفي العزيز عليا.. واحركه بالشكل ده.. هل أنا بعمل كده بغرض التسلية وتقضية الوقت ولا بعمل كده علشان يكون ونس معايا وأنه بيتكلم وهل هذا سيؤثر في زيادة الشجون وزيادة الحزن وعدم نسيان الفراق.. وليه ربنا مش خلق لينا كده من الأول.. طبع الإنسان هو نسيان الحزن ونهي الرسول صلي الله عليه وسلم عن إقامة الحداد أكثر من 3 أيام.. ولكن لو فضل الحزن ده موجود ومرتبط بهذه الصور المتحركة اللى عملنها.. هل ده مناسب للإنسان وصحته النفسية والعقلية وهل ده مناسب لسعادة الإنسان؟.. لأنه ليس ضروريا أن نعرف الآن ده صح ولا غلط ولكن الموضوع يحتاج إلى التفكير والتدبر ثم المناقشة والتجربة ونشوف التأثير والأصل أنه لا ضرر ولا ضرار وهكذا.. هل الهدف النفع؟ واحنا مع النفع ونرفض الفساد والضرر".