"نوستالجيا" رمضان 1999.. عمرو دياب ما نطقش كلمة فى إعلان موبينيل.. المصريون كانوا بيستنوا مسلسلى "أم كلثوم" و"الرجل الآخر".. وبرنامج شقاوة بيخليك تشوف حياة نجمك المفضل.. وبكار وقصص الأنبياء كسبوا ثقة الناس

تحدثت الفنانة ليلي عز العرب، مقدمة برنامج "نوستالجيا" على قناة الحياة، عن أيام رمضان عام 1999، قائلة:" الناس كانت حاسة إن السنادى زى الحبل المشدود بين الماضى والمستقبل، وشهد تنوع أكتر من الأعمال الدرامية، وزيادة عدد القنوات التليفزيونية".

أضافت ليلى عز العرب، أن كل أسطح البيوت كان عليها طبق دش، لكن الخيار الأول كان عند الناس اللى نعرفه أحسن من اللى منعرفوش، وهما القناتين اللى تعودنا عليها ومخيبوش ظننا وقدمولنا وجبة رمضانية".

تابعت، بعد شهرة إعلان موبينيل السنة اللى فاتت، فى إعلان تانى نزل لنفس الشركة فى رمضان 1999 وانتشر تانى علشان بطلة عمرو دياب من غير ما يغنى ولا يتكلم".

كما تحدثت عن إعلانات رمضان عام 1999، قائلة: "جوائز إعلان زيت "سلايت" كانت قيمة زى أطقم معالج أو شوايات أو خلاطات.

وأكدت ليلى عز العرب، أن دراما رمضان 99 كانت دسمة عشنا فيها أيام جميلة والبداية مع مسلسل أم كلثوم، بطولة الفنانة صابرين، عن قصة حياة كوكب الشرق، لافتة إلى أنه عمل متكامل، كما فاجأتنا الدراما بعمل تانى مهم وهو مسلسل "الرجل الآخر" بطولة نور الشريف وميرفت أمين، واللى خلى الناس متشوقة كل يوم علشان تشوفه وده إبداع فنى صافى".

وقالت ليلي عز العرب، مسلسل "لما التعلب فات" بونبوناية رمضان 1999 الحدوتة اللى غزلها بقلمه المدهش أسامة أنور عكاشة، وجمال العمل فى فكرته وأبطاله، واللى جمع الفنان محمود مرسى مع يحيى الفخرانى فى عمل درامى واحد".

تابعت ليلى عز العرب، وعلشان مصر دايما ولادة هتفضل تطرح موهوبين جداد طول الوقت مهما غاب عن الصورة موهوبين أصحاب بصمة قبلهم، وفى رمضان 99 ظهرت فوازير حلوة وممتعة وهى "العيال اجننت" بطولة ياسمين عبد العزيز وعبد الله محمود ومحمد سعد.

وقالت 1999 كانت سنة الأفكار الجديدة وظهر خلالها برنامج من أجمل البرامج اللى تم إنتاجها فى مصر وفكرته طازة وصالحة لكل وقت وهو برنامج "شقاوة" كان بيستضيف فى كل حلقة فنان وأحد المشاهير".

وأوضحت أن الضيف بيروح مدرسته وبيسترجع مع معلمه أيام الشقاوة، وفيه سواقين الباص واللى قعدوا على نفس التختة اللى قعدوا عليها زمان، والبرنامج حالة حلوة من النوستالجيا اللى تخليك تشوف بعد تانى كله شقاوة من حياة نجمك المفضل، وغنى تتره محمد حماقى فى بداياته الفنية".

امتعتنا الفنانة ليلي عز العرب، بالحديث عن كارتون "بكار" قائلة:" كان طبيعى رحلة الطفل الأسمر الجميل بكار تكمل معانا فى رمضان 1999 واستطاع المسلسل المصرى الكبير فى الجزء الجديد إنه يبقى قريب من الكل".

وتابعت، وكمل معانا بردو فى رمضان 1999 مسلسل "قصص الأنبياء" للصلصال للأطفال، واللى كسب ثقة الكبار مع الأطفال، مؤكدة أن رمضان وقتها كان لحظة مميزة مزيج بين دفء التقاليد ولمسة التغيير اللى بدأت تظهر فى حياتنا، والمسلسلات والفوازير خلت الشهر ده رحلة حلوة، وكان استمرار لرحلة سحر حلوة وحلم مبينتهيش".

انطلق برنامج نوستالجيا على قناة الحياة، وهو البرنامج الذي أعادت به قناة الحياة نوستالجيا زمن الفن الجميل، والذكريات الممتعة مع أجمل لحظات مرت على حياة المصريين، خلال شهر رمضان من خلال برامج ومسلسلات وفوازير وإعلانات شهر رمضان الكريم التي ارتبطت مع الجمهور على مدار سنوات طويلة.