نجل مسن المترو: والدي رفض اتخاذ إجراء قانوني ضد الفتاة رغم تشهيرها به وصورته

قال أحمد عبد العال نجل مسن المترو، إن والده استغرب من رد فعل البنت لما زعقتله ورفعت صوتها عليه، وقالها طيب أنا بكلمك براحة وجاي أقولك مايصحش تقعدي كده ونزلي رجلك عيب علشان أنا راجل كبير، راحت قالتله انت مالك أنا حرة وبعد كده بدأت تطلع الموبايل عشان تصور الفيديو اللي انتشر والناس كلها شافته.

وأشار نجل مسن المترو خلال اتصال هاتفي علي تليفزيون اليوم السابع، إلي أن والده اتعصب لما شاف البنت بتصور بالموبايل، وقال إن والده لما كلم البنت عشان هو شايفها إنها زي حفيدته، وحب إنه ينصحها، وفي نفس الوقت الوضع كان هو مضايق منه عشان حاطه رجلها في وشه، وهو راجل كبير في السن، وإحنا في مجتمع شرقي مش قاعدين في دول الغرب، إحنا طبعا مع الحرية، بس لازم تحترم غيرك.

وأكد نجل مسن المترو، أن والده رفض اتخاذ إجراء قانوني ضد الفتاة بالرغم من إنها شهرت به وصورته، وأنا نفسي أوصل للبنت عشان أكلم أسرتها وأقولهم إن اللي حصل من بنتهم ده بيتنافي مع الأصول والأداب والأعراف والدين.