محمد فضل: مشكلة الأهلى فى إنهاء الهجمات والدباغ "هجام"

أكد محمد فضل نجم الأهلى السابق، أن الأهلى عنده مشكلة كبيرة في إنهاء الهجمات قبل مواجهة الزمالك في المباراة المقرر لها الخامسة والنصف مساء اليوم الأحد في نهائي كأس السوبر المصرى في الإمارات.

وقال محمد فضل، خلال حواره مع الإعلامي إبراهيم عبد الجواد في برنامج "ليالي السوبر" المذاع على قناة أون سبورت: "الأهلى عنده مشكلة في المهاجم والظهير الأيسر، وأعتقد إنه هتكون هناك تدعيمات كبيرة جدا في يناير المقبل لكى يظبط القائمة، وجراديشار لعب مباراة كويسة جدا أمام سيراميكا، فأعتقد أنه هيكون الأساسى".

وأضاف نجم الأهلى السابق: "تدعيمات الأهلى الماضية تركزت في مكان واحد الجناح الشمال جبت تريزيجيه وبن شرقى وكمان بن رمضان بيميل للشمال، فمحتاج إنهم يتعاونوا مع جراديشار اللى بيحب يلعب في العمق".

وتابع: "عدى الدباغ مهاجم هجام هيتعب أي دفاع فلو جاهز هيكون أساسي أمام الأهلى، وأحمد عبد الرؤوف بيعرف يبص على المباريات فهيراجع المباريات اللى الزمالك كسبها أمام الأهلى ويستفيد منه، فهيلاقى جوميز كان بيعمل استحواذ وضغط مبكر فمن الممكن أن ينفذ نفس النظام".

وعن تشكيل الأهلى، قال: "تشكيل الأهلى هيكون زى ماتش سيراميكا مفيش تغيير، وأكثر شيء يفتقده الأهلى هو إنهاء الهجمات بشكل صحيح، الأهلى زمان كان بيروح 3 هجمات بيسجل هدفين، لكن دلوقتى الموضوع صعب لأن الأهلى بيروح كتير جدا وبيسجل عدد قليل جدا من الأهداف وده اللى مزعل الجمهور".