أنا اشتغلت بالمتحف الكبير.. منى نعمان: ذكرياتي مع البيت الكبير

أنا قلت يالا، أنا كمان أنزل بوست عن ذكرياتي في المتحف الكبير اللي ابتدت من سنة 2010، وإن شاء الله أول ما أرجع من السفر بعد الإجازة الطويلة دي أكمل الحكاية.

المتحف عمره ما كان مجرد مكان شغل لينا… إحنا كنا بنقول عليه البيت الكبير، وفعلاً كان كده، عيلة كبيرة بكل ما فيها — بنتخانق ونتصالح، نختلف ونتفق، بس في الآخر دايمًا مع بعض، في الحزن قبل الفرح.

أنا شخصيًا عندي عيلتين جوا المتحف: عيلتي الصغيرة زمايلي في الإدارة.. وعيلتي الكبيرة.. كل المتحف بكل اللي فيه كنا بنضحك ونتعب ونشتغل كتيييير، بس عمرنا ما كنا بنزهق، كنا دايمًا بنقول "كله عشان مصر 🇪🇬"”، يمكن كنا بنقولها هزار، بس النهارده أنا متأكدة إن كلنا كنا بنقصدها بجد، وكل تعبنا كان عن حب وإخلاص.

فاكرة أول يوم دخلت فيه المتحف، وكانت المكاتب جنب تمثال جدو رمسيس ، أرض المتحف كانت لسه كوم رمل سنة 2010، كنا بنسلم عليه الصبح أول ما نوصل، ونقوله "نشوفك بكرة" وإحنا ماشيين.

ابتديت وقتها مع مجموعة من أشطر الأثريين نسجل ونحصر القطع اللي هتتعرض، نجتمع مع الشركات والمصممين، نتناقش ونعدل، وكل أزمة أو توقف كنا نعديه ونقول "معلش… الخير جاي قدام".

والسنين عدّت… ناس مشيت وناس جات، والعيلة كبرت أكتر وأكتر.

منى نعمان -

وفي 2015 كان ليا الشرف بمسؤولية جديدة كرئيس العرض لمجموعة توت عنخ آمون والدولة الحديثة، وبعدها مشرف على باقي المجموعات، وبعدها مدير العرض المتحفي.

ولحد ما أخدت الإجازة من سنة وشوية، كانت المسؤولية كبيرة… بس الحمد لله ماكنتش فيها لوحدي، كانت عيلتي في المتحف معايا، ونجحنا سوا نحقق عرض العالم كله بيتكلم عنه النهارده .. ناس كتير ماتعرفش إن قاعة توت خلصت من كذا سنة، ماعدا قطع بسيطة كانت لسه في التحرير، واللي الفريق العظيم في المتحف كملها على خير.

بس الحلم الحقيقي اللي كنا مستنيينه… افتتاح القاعة.. النهارده العالم كله مستني معانا يشوفها، وإن شاء الله هيشوفوا حاجة يفضلوا يحكوا عنها لأولادهم وأحفادهم.

من قلبي بشكر كل حد في المتحف، كل أستاذ، وكل زميل وزميلة، وبقولكم حتى لو مش معاكم دلوقتي… أنا معاكم بالفرحة اللي جوايا إن الحلم أخيرًا بيتحقق 
واستنوني إن شاء الله أرجع من السفر ونحتفل تاني وتالت، ويفضل المتحف المصري الكبير يحقق إنجازات ترفع راسنا كلنا.. مبروك علينا، ومبروك على مصر كلها 🇪🇬.

المتحف المصري الكبير… هدية مصر للمصريين  

منى نعمان أول مديرة للعرض المتحفي في المتحف المصري الكبير