عبدالرحمن بلالة: بعرف كل أنواع الإنشاد وغنيت بالصدفة فى مولد السيدة زينب

استضافت الإعلامية إسعاد يونس، مقدمة برنامج "صاحبة السعادة"، المذاع على قناة دى إم سى، نجوم الأغاني الشعبية بالمحافظات، وهم عبدالرحمن بلالة من القاهرة وحساني القوصي من قنا ومحمد البنجاوي من سوهاج وكذلك أمين صالح من العريش.

وقال عبدالرحمن بلالة: "والدى كان منشد دينى وكنت بروح معاه الليالى وانا صغير، وعلشان كده عندى فكرة عن كل أنواع الإنشاد الدينى، وحبيت آلة الكمان، واشتغلت مع المشايخ، واللى أسعدنى إنى كنت مع عتاولة الإنشاد وكانوا مقربين من والدى، وتعلمت منهم فن الإنشاد".

وأضاف عبد الرحمن بلالة، :"اشتغلت حتى مع الفرق النوبية، وغنيت فى مولد السيدة زينب لما المنشد الأساسى مجاش بالصدفة، وربنا أكرمنى ووفقنى وبعد أول ساعة واحد قرب منى وقالى وقف اسمك إيه ؟ وكان مقدم برنامج وتانى يوم بعدما سجل معايا أذاع الحلقة بعدها بـ 3 أيام".

تابع،:" قدمت فى الإذاعة، واتعلمت من الفنان الشعبى، وحبيت المزيكا وغنيت فى باريس عن طريق وزارة الثقافة وبلاد كثيرة فى أوروبا، وقعدت 7 سنين فى البحرين رايح جاى علشان أتعلم أغنى خليجى، كما تخصصت فى الموال، مؤكدا أن الموال بيظهر المطرب".