كشف المطرب الشعبى حسن الخلعى كواليس أغنية سطلانة وسر نجاحها وانتشارها وتصدرها الترند خلال الأيام الماضية.
وقال خلال حواره لبرنامج يا عين ليل، تقديم عادل عبدالله، إن صاحب الأغنية وفكرتها هو المنتج والمخرج كريم السبكي، وأضاف حول قصة الأغنية "كريم السبكى كان بيعمل فيلم اسمه بعد الشر، بطولة على ربيع وأوس أوس ، والفيلم كان فيه أغنية ، وكريم طلب منى إنى ألاقى أغنية للفيلم وجبتله واحدة واتنين وتلاتة، لكن هو قالى مش ده اللى فى باله".
وتابع "بعد كده لقيت كريم بيقولى معايا أغنية حلوة اسمها سطلانة، وهانى محروس عمل الأغنية مع مصطفى حسن، وابتدوا يدوروا مين يغنى الأغنية، وأنا ما كنش فى دماغى خالص إنى ممكن أغنى فيها، أنا كان كل اللى فى دماغى أطلع مع على ربيع فى الفيلم ، وكنت فاكر إن على ربيع هو اللى هيغنى".
وقال المطرب الشعبى حسن الخلعى "قعدوا يفكرو قالوا نجيب عبد الباسط حمودة، وفكروا فى أسماء تانية لأنه كذا كوبليه وقالوا محمود الليثى وباتشان، ورحنا سجلنا الأغنية، وقلت لكريم أنا عايز أغنى فى الأغنية، وغنيت وسجلنا الأغنية".
وأكمل المطرب الشعبى حول كواليس الأغنية "بعد كده تم تصوير الفيلم والأغنية بقت جوه الفيلم، والفيلم نجح وقت عرضه داخل مصر وخارجها".
وكان الانتشار الأكبر بعد كده فى بطولة الأهلى، وخرج طاهر محمد طاهر بعد الحصول على البطولة يغنى الأغنية، وفرحت جدا إن فريق النادى الأهلى ابتدى يغنى ويردد الأغنية ويرقصوا عليها، وتابع "ما توقعتش إنه يحصل اللى حصل ، والدنيا تتقلب بالكشل ده بعدها، فى الأفراح يرقصوا عليها، فى المواصلات، فى محلات الكشرى، انتشار كبير جدا، الأغنية عملت 4 ملايين فى نص يوم، وهى كانت بقالها 4 شهور، وكانت عاملة أرقام مش وحشة بس ما وصلتش لدلوقت طبعا، ما فيش غنوة تجيب 4 ملايين فى يوم".
