كشفت الفنانة شهيرة، عن فترة غيابها عن الفن، قائلة : "بحب مهنتى وبعتز بيها ولكن اللى بعدنى عنها وفاة محمود ياسين، وليا سنوات كتير بعيد عنها وقربت من ربنا اكثر وعرفت حاجات كتيرة فى العلاقات الإنسانية.. وقررت البعد عن الفن فجأة ولم يعرف محمود ولا أولادى وده اللى ربنا اختارهولى وده الأحسن".
وأضافت خلال حوارها مع الإعلامية إيمان الحصرى عبر برنامجها مساء دى إم سى المذاع على قناة دى إم سى، : " مبحبش السهر وممكن أقعد شهر كامل فى البيت.. وحياتى لم تتغير كثيرا بعد قرار اعتزال الفن"، لافتة : "شربت أدوية ومسكنات كتير عشان احضر الحلقة وأنا عندى دور برد وتعبانة".
وعن علاقتها بزوجها الراحل محمود ياسين قالت : "العلاقة بينا مبينة عن قصة حب وتفاهم.. والتفاهم ما بينا كان أهم حاجة.. وكنت أكاد أكون عاقلة في قصة الحب.. وكنت ديما أفضل صعوده فى المجال الفنى على حساب نفسى.. وأنا كنت بهتم بالمنزل والعيال.. ومستحيل كان يرشحنى لأى دور فى أى فيلم يشارك فيه.. ولكن لو المخرج رشحنى يوافق على كده".
وتابعت: "كل حاجة اتغيرت بعد وفاة محمود ياسين واتعلمت حاجات كتير ونظرتى للحياة اتغيرت.. وصاحبت الوحدة وبنام لوحدى فى البيت بالرغم من واولادى كل واحد فى بيته وجنبي قاعدين.. ولما كان معايا كانت الدنيا كلها معايا وبعده صاحبت الوحدة عشان أقدر اتحملها".
وأوضحت: "عندى أصحاب لا تتعدى على أصابع اليد الواحدة.. مسلسل مخلوق أسمه المرأة عاوزين يتذاع على قناة دى إم سى مسلسل حلو وكل يوم بشخصية.. ومعايا كلب ليها سنتين معايا بتسمع الكلام وبتونسنى فى البيت لما بكون لوحدى وبتحس بيا قوى".
تم أضافة تعليقك سوف يظهر بعد المراجعة