قال الرئيس عبد الفتاح السيسي، إن الدولة تعمل على تطهير كافة البحيرات المصرية، مضيفا: "مصر شغالة بتطهر بحيراتها واقتربت من الانتهاء، ومنها بحيرة المنزلة التي بمساحة 250 ألف فدان، ودلوقتي بقت زي البحر المتوسط، بعد ما كانت ملوثة، واهتمامنا بالبيئة نعتبره أمر ضروري وحتمي لا بد أن نتحرك فيه، ولما اتعملت الشبكة القومية للطرق في مصر كان الهدف منها نوفر 8 مليارات دولار سنويا حجم الوقود الذي يستهلك في الإشارات والوقفة".
وأضاف الرئيس السيسي، في كلمته بالقمة العالمية للحكومات بالإمارات: "كنا كلنا كفكرة في مصر إن الدولة تعمل ده علشان تحمل المسألة دي والـ8 مليارات دولار اللي بيستهلكوا، وإحنا بدأنا رسميا مع مؤتمر باريس ثم في جلاسكو كملنا علشان كنا هنستلم المؤتمر اللي انتوا شفتوا فعالياته، وحرصنا على أن يكون مؤتمر التنفيذ، وإحنا اتكلمنا كتير جدا في التعويض والدول المضارة بالتلوث خاصة الدول النامية والفقيرة، وكان مطلوب مننا نجهز المؤتمر كويس علشان نخرج بقرار عملي حقيقي يلزم الدول الصناعية الكبرى لتدخل في صندوق التعويضات أو تحمل جزء من الخسائر الناجمة عن برامج الإصلاح البيئي".
وأكمل الرئيس السيسي: "ماذا عن الإمارات هذا العام؟ نحن في تنسيق، والإمارات كانت معانا من قبل ما نعمل مؤتمر المناخ وبتشوف إحنا بنعمل إيه علشان هما ديما بيسبقونا".
وأردف الرئيس: "الدول حاجة والحفاظ عليها حاجة، واللي ممكن يبقى بين الناس وحتى في الإعلام والمثقفين والمفكرين والسياسيين، اللي ماسك الدولة بإيده مهما كانت الدولة.. والله ماسك النار بإيده، والله أي مسؤول بيقود دولة، غنية، متطورة، فقيرة، ماسك النار، وديما بأقول حافظوا على بلادنا وشوفوا الآثار والأحداث اللي مرت، وأنا مش بحب أقول أسماء دول حتى لا أؤلم أحد، والدول اللي دخلت في الصراعات اللي دخلنا فيها في مصر في 2011 و2012 و2013 بنتخلص منها بعد 10 سنين، على فرضية نجاح مسار الحركة".
وأتم الرئيس عبد الفتاح السيسي: "وهنا في المؤتمر العاشر فرصة عظيمة جدا للناس تسمع وتشوف وتتعلم من بعضها التجارب والمسارات اللي تم العمل بيها واللي نجح منها نجح ويتقال، واللي مانجحش يتقال برضوا علشان نتعلم كلنا".
