يقول شادى محسن، خادم بكنيسة السيدة العذراء للأقباط الكاثوليك بشبرا، إن شهر رمضان بالنسبة له من أجمل الأوقات التى تمر عليه خلال العام ويشعر خلاله بروحه المختلفة وطعمه المختلف عن باقى أيام السنة ليس فقط بسبب الخروج مع الأصدقاء والأحباب والإفطار معا لكنه شهر كريم وشهر خير وبركة وله روحه مختلفة.
وتابع: «لما كنت فى المدرسة والكلية كنت ساعات بصوم مع أصدقائى فى المدرسة من إخواتى المسلمين وبعد ما بنخلص دروس مع بعض بنروح نفطر فى أى مكان وكنت بحس بروح مختلفة وفى فترة الكلية كنت تقريبا مرتين تلاتة فى الأسبوع صحابى يعزمونى على الفطار أو على السحور فى السنين الأخيرة بالذات فى أخر سنتين بتحصل صدفة حلوة قوى إن شهر رمضان بيجى متزامن مع الصوم الأربعينى المقدس فالصيام يكون مختلف فهو شهر البركة وشهر الخير».
وأضاف: «منقدرش ننسى فوازير رمضان الجميلة والمسابقات والكنافة والقطايف بتكون شيء أساسى فى كل بيت مصرى فى الشهر الكريم وبنصلى كلنا لربنا إن فعلا يعم السلام فى مصر والعالم ويحفظ بلدنا الحبيبة من كل شر ومكروه ومن أكتر الحاجات اللى فعلا بتدى بهجة وروح مختلفة لشهر رمضان إن بعد ما بتفطر مع صحبك بتنزل معاه فالشهر بالنسبة لى له بهجة خاصة وروح تانية عن أى شهر من شهور السنة فمن كل قلبى بهنى إخواتى المسلمين بالشهر الكريم وربنا يديم المحبة والمودة دايما ما بينا ويحفظ بلدنا من كل شر ومكروه».
تم أضافة تعليقك سوف يظهر بعد المراجعة