تحدث المطرب الشعبى حكيم عن كواليس قضائه لشهر رمضان المبارك خلال حواره فى برنامج "ملوك الزحمة" المذاع على شعبى إف إم من تقديم لينا صالح قائلا: "أنا فى رمضان بعمل خيمة فى البيت الـ 30 يوم سحور وفطار بعزم فيها اخواتى وقرايبى وأصحابي، وبتخن جامد فى رمضان".
وتابع حكيم: "أكتر حاجة بتبقى موجودة فى الفطار السوبية والقطايف، وموضوع الأكل مش بيشغل بالى خالص أنا باكل أى حاجة قدامى، بس أنا مش أكيل أوى ممكن أكل أى حاجة حتة جبنة ونص رغيف مليش طلبات فى الأكل انا بحب الحلويات أكتر".
وأضاف حكيم: "أنا مودى بيتغير بسرعة بين اللحظة والتانية مع إنى برج الميزان مش عارف ده له علاقة بالبرج ولا عيب فيا وعمرى ما عملت عيد ميلاد وأولادى بيجيبولى تورتة وخلاص والسنة الجاية ممكن أعمل عيد ميلاد".
وعن أولاده قال الفنان حكيم: "على ابنى شبهى شكلا، وعمر شكلى أوى، وأحمد مش أوى، أما مريم ممكن تلاغى بلد فى وقت واحد قريبة أوى للناس، وولادى ملهومش دعوة بالفن خالص بس لو حد عنده الموهبة هشجعه".
أما عن طفولته قال حكيم: كل 3 دقايق كنت باخد علقة وأنا صغير كنت بعمل مصايب ومشاكل مع أى حد معدى فى الشارع كنت شقى مع الناس بس بحب، وأبويا كان بيزعل ان الناس بتشتكى منى لان والدى كان جد اوى ومكنش يضحك كتير بس كان دمه خفيف، وحسيت بحنية ابويا بعد وفاة أمى رغم شدته وحزمه، وأنا اخدت منه الحكمة والطيبة والتفكير الصائب عشان كدة اخواتى لازم يشورونى فى كل حاجة و ياخدوا رأيى.
وتابع حكيم: "ببقي شايل هم أى فرح اكتر من أى حفلة عندى لانها ليلة العمر للعريس والعروسة فلازم أبسط الناس فببقى متنشن شوية"، وعن مواقف الأفراح قال حكيم: "مرة موقف حصل فى فرح كنت بغنى فيه والعريس طلق عروسته فى الميكروفون وواحد ساب عروسته ومشى عشان رقصت معاها وأبو العروسة قالى كمل انا عامل عيد ميلاد بنتى وقلبها عيد ميلاد فعلا".
وعن غنائه فى مسرح أولمبيا في باريس قال حكيم: "غنيت فيه بعد ما وقفت عليه أم كلثوم واحتمال اغنى عليه تانى لأن عندى جولة غنائية فى فرنسا قريب، ومسرح أولمبيا بالنسبة لى وقتها كان اخر محطة عشان كدة فكرت أعتزل، وغنيت فى احتفالية جائزة نوبل للسلام ومكنش حد غيرى غنى وغنيت فى أماكن كتير مكنتش اتخيل انى اغنى فيها".
وعن الشارع المصرى قال حكيم: "هو الشارع الجدع وابن البلد والأغنية اللى بتعبر عنه مش قليلة، والأغنية الشعبية فيها فرحة وحزن والم ولازم نحافظ على رونقها واحترامها لأن فيه ناس بتطلع تحت مسمى الأغنية الشعبية، وببقي قاصد أخد الألفاظ من كلام الناس زى أغانى، السلام عليكم وأفرض مثلا، أما أغنية الجرسون هى حالة وصورة فى نفس الوقت تسمعيها تحسى ان فى ناس مش جدعان وفى ناس غدارة والأغنية دى مكنتش بتاعتى سمعتها بالصدفة وكان حد تانى هيغنيها بس أنا فضلت أفرك لحد ما ختها بالتوزيع تاعها من المنتج".
حكيم ولينا صالح
النجم حكيم
الفنان حكيم
المطرب حكيم
حكيم
لينا صالح
حكيم ضيف برنامج ملوك الزحمة
تم أضافة تعليقك سوف يظهر بعد المراجعة