بث مباشر لكاميرا التلفزيون اليوم السابع، ندي عبد النبي البالغة من العمر 28 عاماً، فكرت خارج السرب، وقررت أن تقيم مشروعها الخاص بها، وهو عربية صغيرة للقهوة والشاى، حتى يكون لها كيانها الخاص والمستقل.
تحدثت ندى عبد النبي، الحاصلة على دبلوم تجارة، خلال لقاءها بكاميرا تليفزيون اليوم السابع، عن فكرة مشروعها وكيف أسسته، قائلة: "فكرت فى مشروع عربية القهوة، لأنى مش عايزة أشتغل عند حد، وكمان مش حابة فكرة إنى أدى مجهودى لحد، وفى الآخر ما يتقدرش، أو أشتغل مع حد رغباته عكس طموحى، وكمان أنا عايزة أعمل حاجة خاصة بيا حتى لو صغيرة لأنها مع مرور الوقت وبالتعب هتكبر ويبقى مشروع كبير وأنا مؤمنة بكده".
وأكدت ندي، اشتغلت في وظائف كتير ومنها مندوبة مبيعات وتوصيل دليفرى وأحمل شنطة علي ظهري وامشي طول اليوم.
تقف ندي بمفردها بمشروعها الصغير، وهو عربية المشروبات الساخنة، وتتعرض لانتقادات البعض وإشادة البعض الآخر، لكن هذا لم ولن يؤثر على عزيمتها أو يرجعها عن قرارها الذى اتخذته عن إيمان شديد بضرورة إثبات ذاتها أمام الجميع، حيث قالت: "الصعوبات اللى بتقابلنى فى الشغل، هى الانتقادات اللى بتتوجهلى من الناس، زى طب ليه يا بنتى تعملى كده!.. وعشان إيه!، غير كمان المعاملات السخيفة من البعض لأنى بنت واقفة فى الشارع بتبيع شاى وقهوة، لكن بعرف أتعامل معاهم كويس، ومن ناحية تانية، فيه ناس بتكون فاهمة ومقدرة شغلى، وبيشجعونى إنى استمر".
