تنام أمام حجرتها يوميا حتى شروق الشمس، لتدخل منزلها عند دخول أول ضوء إلى حجرتها، 20 سنة عايشة فى الظلام بدون نور، الحاجة سعدة ابنة محافظة المنوفية، توفى زوجها وتركها وحيدة بين أربعة حيطان.
وتقول الحاجة سعدة في لقائها مع "فتحى شو": "عمرى ما شوفت النور ونفسى أشوفه قبل ما أموت، بقالى 20 سنة من غير لمبة وعايشة بشمعة وكنت بتحايل على جوزى يدخل الكهربا للبيت وكان رافض نهائى أنه يدخل النور، ولما مات من 6 سنين بجرى من ساعتها علشان اركب الكهرباء ومش عارفة يا ابنى".
وتابعت باكية: "أنا اتجوزت وكل ولادى ماتوا من الراجل الاولانى واتجوزت جوازه تانية وكان راجل طيب وشيلته لحد أما مات ومخلفناش، كان نفسى في ضنا يشيلنى في الأيام ديه بس الحمد لله على كل حال، أنا عيشت لوحدى وهموت لوحدى برضه".
واستكملت: "عايشة مع القطط في الأوضة وباكلهم من أكلى بيجوا ياكلوا وبيمشوا، حساهم ولادى وبيسمعوا كلامى اللى بقوله وبينفذوه من العشرة فهمونى وفهمتهم، بحط الأكل قدامهم ومحدش فيهم بيقرب للأكل إلا بالاذن منى، وبربى هنا في الأوضة فراخ ولما بجوع بدبح واحدة واعملها واكولها انا والقطط وادينى عايشة".
