أكد شادي محمد، نجم الأهلى السابق، أن البرتغالى مانويل جوزيه هو صاحب سحب الشارة من عصام الحضرى، وكان له نظام صارم لا يقبل بأى تهاون من أي لاعب مهما بلغت قيمته.
وقال شادى محمد خلال حواره مع إسلام الشاطر في برنامج "البيت الكبير" المذاع على قناة الأهلى: "مانويل جوزيه دخل غرفة الملابس وقال لعصام الحضرى أنت مش هتبقى كابتن للفريق بعدما حدث مشكلة بينهما، وكابتن حسن حمدى أكد أن هذه المشكلة من اختصاص المدير الفني".
وأضاف: جوزيه عمل اجتماع مع اللاعبين تانى يوم، وقال مين الكابتن بعد عصام الحضرى، فرفعت إيدى فقالى أنت من الآن كابتن الفريق، فتحدثت مع الحضرى وقلتله أنت هتفضل ليك قمتك، ولكن بعد كده خدنا الـ5 بطولات اللى دخلناها ورفعتهم".
وتابع: "موقف الأتوبيس الكاشف يوم لا أنساه كل جماهير الأهلى كانت متواجدة في كل الشوارع ومعظم اللاعبين بكت من روعة المشهد، فقلت لهم أنتو بتفرحوا بتعيطوا بتحزنوا تعيطوا، وإيهاب توفيق كان معانا في العودة من الكاميرون بعد الحصول على البطولة من القطن، كان مولع الأتوبيس احتفالات وأغانى".
واستطرد: "الأهلى كان واضع نظام يطبق على الكل، زى مثلا بعد كل إجازة زيادة الوزن الكيلو بألف جنيه، وأول ما تخش التمرين تطلع على الميزان فأى لاعب كان بيلاقى نفسه زائد كان بيروح يلف الملعب ينزل نفسه علشان الخصم، والشراب المختلف".
واختتم: "مانويل جوزيه كان يتواصل مع الدكتور إيهاب على أي لاعب نفسيته مش تمام فكان بيستبعده، في مرة جوزيه مسك بركات سلخه، فبركات كان زعلان من كلامه، ومستر مانويل متعود يخش الجيم بعد التمرين، وبركات كان باين عليه الزعل، فقاله مالك، فبركات رد وقاله أنا كنت كويس ومعملتش حاجة علشان تنتقدنى كده، فقاله الإصابة مش في رجلك ولكن في مخك، وغضب جدا وقاله دا شغلى، وأنا اللى عارف أنا بعمل إيه، راح بركات حس أنه غضبان وهيقلب عليه فراح قاله يا كوتش أنا جاهز للماتش".
تم أضافة تعليقك سوف يظهر بعد المراجعة