"اتعرفوا على بعض فى 6 أيام".. أسرار قصة حب رجاء الجداوى وحسن مختار

كشفت أميرة مختار ابنة الفنانة القديرة الراحلة رجاء الجداوى، عن حياة والدتها الأسرية وزواجها بنجم الإسماعيلى الكابتن حسن مختار، قائلة: "ماما أول ما شافت والدى فى السودان كان بيقرأ كتاب فى الفندق، سألته أنت ليه مجتشي تسلم عليا، قلها أنا بقرأ كتاب وعجبها بابا.. وبعد ما بابا نزل القاهرة أتجوزها فى 22 فبراير، وكان أتعرفوا على بعض في 6 أيام بس، وبعد 11 يوم اتجوزوا.. وانتهت القصة بوفاة بابا بعد 46 سنة".

وأضافت خلال حوارها مع الإعلامية ريهام السهلى عبر برنامجها المواجهة المذاع على قناة إكسترا نيوز: "كانوا بيتقاسموا كل حاجة.. وأى حاجة كانت مشاركة بينهما وأى حاجة فى البيت كانت مشاركة بين بابا وماما.. وماما كانت بتعشق بابا.. وكانوا بيحبوا بعض قوى". 

وعن علاقتها بوالدتها وبنتها قالت: "ماما كان لما تعاقبنى كانت بدور وشها ومتكلمنيش وكان أقصى عقاب ليا.. وكجدة كانت بتبوظ كل حاجة ليا فى بنتى روضة.. وبنتى كانت مبتسبشي ماما خالص وكانوا توأم ملتصق.. وبنتى روضة مفتقدها جدا دلوقتى ومش قادرة تملى الفراغ".

وأضافت: "عادات وتقاليد والدتى تغيرت بعد وفاة والدى.. لأنهم كانوا أشقية بيسافروا ويروحوا وكانوا بيكملوا بعض.. وكنا عايشين مع بعض ولكن هى افتقدت والدى.. وماما كانت كل حاجة بتكون معاها بالصدفة.. ودخلت التمثيل بالصدفة وجوازها بالصدفة ودخولها عالم الأزياء.. والإعلام وتقديم البرنامج مع عمرو أديب.. وأى حاجة تحصل لها صغيرة كانت بتكلم وبتتقرب لربنا كتير".

وتابعت: "ماما بتعمل بهجة فى البلاتوه على الصغيرين والكبار.. وبتحب تاخد الغداء وتغير البلاتوه وتخليه لطيف ولذيذ وكانت بتحب الحياة.. وكانت تلميذة شاطرة وبتابع كل الجديد.. وكانت الفنانة منى زكى بتيجى تعملها العصائر بأديها لما كانت تعبانة بمواصفات معينة.. وكانت على تواصل مع عدد كبير من الفنانين الشباب".

وعن تكريم الرئيس عبدالفتاح السيسى لرجاء الجداوى، قالت ابنتها: "ماما قالت لى تكريم بيقدر دور الست، وهى رسالة لدور الفنان المصرى.. وسبتلكم شيء نفتخر بيه.. وقبل رحيلها طلبت منى حاجات أعملها.. ورفضت وقولتلها أنك هتبقى كويسة.. ولكن للأسف طريق مشواره صعب ومن أوائل الناس اللى جالهم كورونا، وكانت حريصة جدا ولكن غصب عنها كانت بتقلع الماسك أثناء التصوير".