خلال الندوة التثقيفية.. الرئيس السيسى يثنى على نضال أهالى سيناء فى مواجهة الاحتلال: "بنحاول نرد جميلكم".. واللواء سمير فرج للرئيس: فخور إنى كنت معاك.. والسيسي: "عمر العين ما ترتفع عن الحاجب"

اللواء سمير فرج للرئيس السيسى: "التخلص من الإخوان هيتكتبلك حتى بعد 100 سنة"

الرئيس السيسى لنجل الروائى جمال الغيطانى: "والدك كان صديقا عزيزا"

شهد الرئيس عبد الفتاح السيسي فعاليات الندوة التثقيفية الـ 34 والتي تقيمها القوات المسلحة في إطار الاحتفالات بنصر أكتوبر المجيد.

وفى بداية الندوة، رحب الرئيس عبدالفتاح السيسي، بأحد أبطال حرب أكتوبر المجيدة، الفريق عبدرب النبي حافظ.

وقال الرئيس عبد الفتاح السيسي: "كل سنة وأنتم طيبيين جميعا واسمحولي إن إحنا نرحب بأحد ابطال حرب أكتوبر، سيادة الفريق عبدرب النبي حافظ.. أهلا وسهلا".

وقدم الرئيس عبد الفتاح السيسى التحية إلى اللواء سمير فرج مدير الشئون المعنوية الأسبق، قائلا: "أوجه له التحية.. وكتير ميعرفوش الكلام ده وكتير من الجيش ميعرفوش الكلام ده.. اللواء سمير فرج كان قائد كتيبتي.. واسمح لى يا فندم أنى أتكلم .. عمرى ما ذكرتها في أي لقاء تليفزيوني.. وهذا الأمر اقدره لأنى مش رافضه.. دائما في الجيش الوحدة قائد.. لو القائد جاى يدير الوحدة قائد عظيم الوحدة تكون عظيمة والعكس صحيح".

وأضاف الرئيس السيسى: "كنت في الوقت ده ملازم أول.. والمقدم سمير فرج جاى يمسك الكتيبة.. القدرة العلمية للواء سمير معروفة جدا والسمعة الطيبة عنه.. وكان راجع من كلية القادة والأركان في بريطانيا.. المناظرة اللى تمت بين اللواء دكتور سمير فرج والرئيس شارون بعد حرب أكتوبر.. ولما روحت الكلية دى كانت المناظرة دى أشهر حاجة".

الرئيس السيسي 

وتابع الرئيس السيسى: "دى السمعة للمقدم سمير فرج.. طب انا اتعلمت ايه منه؟ .. اتعلمت منه حل المشاكل.. في كل وحدة في الجيش فيه مشاكل.. خدنا ضابط استطلاع وأمن الكتيبة بعد أسبوع.. فوجئت أن كل المشاكل الموجودة في الكتيبة حلها.. له تاريخ في إيجاد حلول للمشاكل.. كل مشكلة وليها حل بهدوء ويسر وفكر.. اتعلمت منه ده.. وكان لى حظ أنى خدمت وهو رئيس اركان الفرقة 33 .. أوجه كل التحية والتقدير يا فندم.. مكنشى ممكن اعدى ومجتش الفرصة قبل كده أنى اشوف سيادتك".

روى اللواء سمير فرج مدير الشؤون المعنوية الأسبق وأحد أبطال حرب أكتوبر، أحد المواقف التي جمعته بالرئيس عبد الفتاح السيسي أثناء خدمتهما في الجيش.

وقال اللواء فرج خلال الندوة التثقيفية الـ 34 للقوات المسلحة بحضور الرئيس عبدالفتاح السيسي: "عمرى ما ذكرت هذا الموضوع في حيات حتى لا يقال أنى أتملق ..ومش هتكلم عن الموضوع تاني..لكن إسمحلى سيادة الرئيس أتكلم المرة دي:"لما رحت الكتيبة ، الملازم اول عبدالفتاح السيسي قعدنا سنة ونصف مع بعض ، كتبت التقرير السري والقوات المسلحة مش زى المدنيين والكتيبة 34 أربعة ياخدوا امتياز..الملازم أول الوحيد اللى خد امتياز هو الملازم أول عبدالفتاح السيسي.

وتابع فرج: "مش بقول النهاردة علشان حضرتك موجود ، كان لازم ورا التقرير الأسباب ، كنا في مواقع دفاعية في سيناء ونطلع طول النهار وبنلف على الكتيبة ونمر وفى يوم حصل عاصفة بالليل والعواصف الرملية الواحد مش بيشوف ايديه والطريق اتردم ، بلغنا قيادة اللواء ، وقيادة اللواء بعتتلنا بلدوزر،  وقلت النهار له عينين ، لكن الملازم أول عبدالفتاح السيسي  قال المدنين هيعدوا الصبح ، ولازم الطريق يبقا مفتوح قال أنا حافظ الطريق يا أفندم ، قلتله لو البلدوزر والمعدات ادمرت هنبقا مش تمام ، قالى هابقا قادر.

الرئيس السيسي يحيي أحد أبطال حرب أكتوبر

وواصل: "دخلت الملجأ ونزل الملازم عبدالفتاح السيسي يفتح الطريق وهنا الحاجة اللى بنقول عليها ان نقول عليه ظابط صاحب قرار ، الكتيبة لازم تفتح ، كلم الشؤون الإدارية الفطار ايه قالولوا فول وجبنة بيضاء وشاي ، قالهم لا ، نعمل عدس لان الدنيا ساقعة والعساكر عاوزة تاخد حاجات دافية ، وقالهم افتحوا جبنة نستو ، لانها اسهل في  التوزيع ، وعلشان الجبنة البيضاء صعبة في التوزيع وبتاخد وقت".

وأكمل اللواء فرج:" الساعة 6 قمت بسال فين فرد الخدمة ؟، فين الضابط عبدالفتاح ؟، قالولى يا افندم داخل ، قالى تمام يا افندم انا فتحت الطريق ، عساكر الكتيبة فطرت وراحت المية والاجازات دخلوا مواقعهم ونازلين علشان ياخدوا اجازتهم، لو ظابط ياخد قرار زي ده يبقا ظابط صاحب قرار، علشان كده كتبت في التقرير الخاص ضابط له مستقبل وصاحب قرار من 40 سنة ومكنتش عارف انه في يوم من الأيام هتبقا سيادتك رئيس".

الرئيس السيسي يشارك فى الندوة التثقيفية

وأضاف: "المنظر ده يافندم شوفته يوم ما قررت تخلص مصر من الإخوان واتخذت قرار التخلص من الاخوان..لا أنافق وبقول كلمة حق وربنتا هايحسابنى اذا كنت كذبت ..كنا مع بعض في المجلس العسكري وكنت أحدث ظابط يوم ما اتخذت قرار بالتخلص من الاخوان هيتكتبلك حتى بعد 100 سنة وكل اللى بتعمله كوم وانك خلصتنا من الاخوان كوم، لذلك يوم 30 يونيو لما وقفت افتكرت من 40 سنة لما اتخذت قرار في الكتيبة وانت عندك 22 سنة، عملها وهو وزير دفاع ..علشان كده انا بتفخر في يوم من الأيام انى كنت مع حضرتك في الكتيبة وبفتخر ان كتبت التقرير ده من 40 سنة..ربنا يوفقك ويكرمك اللى بتعمله النهاردة حلم كنا بنحلم بيه زمان..ربنا بيكرم مصر بالناس بتوعها عبدالناصر كان راجل عظيم والسادات كان راجل عظيم ، ومبارك كان راجل عظيم أيا كان له ما له وعليه ما عليه وسيادتك راجل عظيم وسعداء بكل هذا التطوير وايدينا في ايديك وهنكمل المشوار".

ليرد الرئيس عبد الفتاح السيسي، على تصريحات اللواء سمير فرج أحد أبطال أكتوبر ومدير الشؤون المعنوية الأسبق، وقوله: "أنا بفتخر إني كنت مع حضرتك في الكتيبة في يوم من الأيام"، ليعلق الرئيس: "لا أنا اللى كنت مع حضرتك".

وقال الرئيس السيسي، خلال كلمته بالندوة التثقيفية "العبور الي المستقبل" بمناسبة احتفالات القوات المسلحة بنصر أكتوبر المجيد، :"عمر العين ما ترتفع عن الحاجب".

وأضاف الرئيس:" هذه الندوة، والحوار، واستدعاء التاريخ، بيدوقنا طعم اللى اتعمل، واللواء سمير فرج بيدوق الشباب والضباط اللى ما شافوش حاجة خالص.. ونحن الآن نستدعى التاريخ ونسرد الوقائع.. هذه الوقائع في وقتها كانت كبيرة.. واستعدنا آخر قطعة أرض وهي طابا من الدكتور مفيد شهاب، الذي نوجه له وللجنته التي ساهمت في مرافعات طابا، كل الشكر وكل التقدير والاحترام".

الرئيس السيسي

وفي رسالته لأهل سيناء، قال :"كان ليكم دور دايما كجزء أصيل من شعب مصر قبل 67، وبعد 73 وحتى الآن، ويمكن الدولة معملت الواجب معاكم، لكن إحنا بنحاول نشكركم ونرد جميل أهل سيناء علينا كلنا.

كما وجه الرئيس عبد الفتاح السيسى، الشكر إلى الدكتور مفيد شهاب، متابعا: "الندوة دى والحوار ده واستدعاء التاريخ بيدوقونا طعم اللى اتعمل.. اللواء دكتور سمير فرج لما يتكلم عن حرب أكتوبر هو بيدوق شبابنا والضباط اللى موجودين هنا اللى ماشافوش ده خالص.. استدعاء التاريخ وسرد الوقائع وقتها كانت حكاية كبيرة اوى.. حكاية طابا وحكاية التحكيم.. ووكنا وقتها بنقول يا ترى هنوصل لايه.. وهل هنقدر نكمل معركتنا دى.. ونسترد طابا كاخر قطعة من أرض مصر وتعود إلينا.

وأضاف الرئيس السيسى: "ما تحقق في ملف طابا كان أولا بالعزيمة الإرادة والعلم والخبرات الموجودة في اللجنة القانونية فى هذا الأمر.. أوجه الشكر للجنة القانونية والدكتور مفيد شهاب.. كل التقدير وكل الاحترام".

وحرص الرئيس عبد الفتاح السيسى على توجيه رسالة شكر للمشاركين في ندوة حرب أكتوبر، خلال الندوة التثقيفية للقوات المسلحة، متابعا: "عمر الشر مهما كانت قدرته يقدر يهزم الخير.. مش ممكن..  دى سنن ربنا في الوجود.. الشر استثناء والخير القاعدة.. وعمر الاستثناء ما يهزم القاعدة.. قاعدة الخير الباقية.. ومن هنا بتكلم مع أهالى سيناء.. وربنا يقدرنا نرد بالبناء والتنمية والتعمير".

وأضاف الرئيس السيسى: "الشعر جميل جدا.. ودائما كلامه رائع ويقدر يقدم أحاسيس.. شكرا جدا جدا وشكرا جزيلا لكم".

وواصل الرئيس السيسى موجها كلامه للمستشار محمد جمال الغيطاني، نجل الروائي الكبير الراحل جمال الغيطاني: "طبعا أنت متعرفشى إن الوالد كان صديق عزيز ليا.. الأستاذ جمال واستمتعت كثيرا بالكلام معاه والوطنية المتدفقة دائما.. خلى بالك احنا من منطقة واحدة".

وأثنى الرئيس عبد الفتاح السيسى، على نضال أهالي سيناء في مواجهة الاحتلال موجها رسالة إليهم قائلا: "طبعا أهالى سيناء لكم دور دائما كجزء من شعب مصر قبل 67 وبعد 67 وقبل 73 وبعد 73 وحتى الآن.. ويمكن الدولة المصرية مقدرتش في وقت من الأوقات تعمل الواجب مع أهالى سيناء.. لكن بنحاول نشكركم ونرد جميل أهل سيناء علينا كلنا". 

وأضاف الرئيس السيسى: "أنتم جزء من الشعب واللى عملتوه في فترة من أقصى الفترات.. وكتير مننا لازم يفهم منا العيش في كنف الاحتلال وتقوم بتقديم الدعم وتعرض حياتها للخطر من أجل تقديم الدعم.. نستمر في دعم سيناء واتاخرنا في هذا الأمر.. وإذا كان اتاخرنا 30 سنة عن التنمية في سيناء.. بفضل الله نتجاوز المدة دى.. وكأن سيناء يتم تعميرها بقالها 30 سنة".

وتحدث الرئيس عبد الفتاح السيسى مع الدكتورة "ياسمين" فتاة مصرية بدوية، من شمال سيناء، عن أهالى سيناء قائلا: "مش هنسى الدكتورة ياسمين احنا نتألم وانتم شوفتم مش بس الناس في سيناء اللى دفعت ثمن الإرهاب.. وكل الدولة المصرية وكل أسرة مصرية قدمت شهيد أو مصاب وكل أسرة من مصر مكنوش في سيناء خالص .. كل محافظات مصر قدموا شهداء ضباط وضباط صف وجنود ومازلنا نقدم شهداء حتى نتخلص نهائيا من الإرهاب.. لا تتألمي من قدر الله فينا.. واطمئني لقدر الله فينا بأيدنا كلنا.. لتعود سيناء أفضل مما كانت.. والخير والأمن والسلام والاستقرار يكون موجود فيها وفى ربوع مصر".

وشاهد الرئيس عبد الفتاح السيسي فيلما تسجيليا بعنوان "لمسة وفاء" عن المشير محمد حسين طنطاوي القائد العام للقوات المسلحة، وزير الدفاع والإنتاج الحربي السابق، من إنتاج إدارة الشؤون المعنوية للقوات المسلحة.

وتطرق الفيلم التسجيلي لعرض لقطات عن مسيرة المشير محمد حسين طنطاوي القائد العام للقوات المسلحة، وزير الدفاع والإنتاج الحربي السابق، حيث أكد الفيلم التسجيلي أنه رمز التضحية والفداء فارس العسكرية المصرية، كما شدد على أنه في حياة الأمم والشعوب رجال تختارهم الأقدار في وقت المحن، ليعملوا على عاتقهم الأمان الثقال والمشير محمد حسين طنطاوي رجل من هؤلاء الرجال.

كلمة الرئيس السيسي

كلمة الرئيس عبد الفتاح السيسي فى الندوة التثقيفية